Qers – Keyeyê Anli, ke seba zimistanê derg ê Qersî amadekarîyê xo qedênaye, vat ke ê seba zimistanî her çî xo bi xo virazenê. Keyeyê Anli vanê: “Zimistan de zî karê ma nêqedîno, ma zimistan de zî dewarê xo pawenê.”
Zimistanê herêma Qersî nêzdî hewt aşman dewam keno. Teşrîna peyêne de dest pê keno û heta gulane-hezîrane wisar nêyeno na herêma Serhedê corêne. No durum zî terba xo amadekarîyêka girde û zehmete ano. Şaro ke Qers û Erdexan de ciwîyeno, her daîm verê mewsimê zimistanî bi metodanê cîya-cîya amadekarîya zimistanî kenê. Seba werî penîr, rûn, qelî û zerzewat kom kenê. Genim ra ardan virazenê û êy ra zî nan virazenê. Tena seba werê xo nê, seba heywananê xo zî amadekarî kenê. Vaşan çînenê û anê, kenê lod. Cew û simerî zî komê pêserî kenê ke heywan zimistanî vêşan nêmano. Şarê na herême seba germbîyayîşê xo yê zimistanî zî zaf amadekarîye kenê, çike zimistanê xo çetin o, kerme û sergînan kom kenê û erzenê têser kenê qela. Herêma Qers û Erdexanî de nê pêro seba zimistanê derg û serd hewceyê ê.
Keyeyê Anli, ke bajarokê Bazarcixî yê qezaya Dîgorê Qersî de ciwîyenê, derheqê amadekarîyanê xo yê zimistanî de qisey kerd.
‘Seba zimistanî zaf çî ma bi destê xo virazenê’
Semra Anli dîyar kerd ke ê seba zimistanî teber ra zaf kêm çî herînenê û her çî bi destê xo virazenê. Semra Anli derheqê amadekarîyanê zimistanî de vat: “Ma seba zimistanî werdan amade kenê. Ma seba zimistanî penîrê xo kom kenê. Ma ardan virazenê û kartolan herînenê. Ma penîrê xo kenê bîdon û postikan de ke zimistanî de tamê ey rind bibo. Zehmetîyê amadekarîya zimistanî zaf estê, labelê ma bi kêfxweşîye xo amade kenê. Ma zexîreyê zimistanî bi keda destê xo amade kenê. Ma genimê hêgayanê xo benê araye de kenê ardan. Ma teber ra nan nêherînenê, ma bi xo virazenê.”
‘Seba heywananê xo zî amadekarî kenê’
Semra Anli da zanitene ke ê tena seba xo nê, seba heywanan û germbîyayîşî zî amadekarî kenê. Aye wina vat: “Ma seba dewarê xo zî vaşan çînenê û kenê balye. Simerî zî serê yewbînî de kom kenê û zimistanî danê dewaran. Ma zibilê heywanan vejenê, kenê basme û dima benê kenê kerme. Ma kermeyan kom kenê, kenê qelax, zimistanî zî êy veşnenê. Dar û komir çin o, coka zî ma seba germkerdişî kermeyan veşnenê. Ma hem karê keyeyî hem zî karê teberî de xejilînê. Ma wina amadekarî kenê. Eno rizq o, çiqas zehmet bo zî ma tede kêfxweş benê. Par zimistan zaf derg bî heta ke dewarê ma vejîyayî teber, ma zaf zehmetî dî.”
‘Zimistanî zî karê ma nêqedîno’
Behîce û Abbas Anli, yê ke cinî û mêrdeyê yewbînî yê, zî derheqê amadekarîyanê zimistanî de qisey kerd û vat: “Debara ma sewalkarîye ser a, ma seba heywananê xo hêgayan ramenê.
Ma simer patoz kenê û vaşan kom kenê. Ma seba germbîyayîşê xo zî kermeyan virazenê. Ma cew, genim û xamkêsan (yulaf) ramenê, hazir kenê û zimistanî danê dewarê xo. Seba germbîyayîşî zî ma sergîn û kermeyan veşnenê. Sergîn û kerme bes nêbê, ma o wext komir zî herînenê. Zimistanî zî karê ma nêqedîno. Zimistan de zî pawitişê dewaran est o û rast a zehmetîyê ey estê. Ma rûnê keyeyî û penîr virazenê. Ma penîrê xo kenê postikan. Ma nanê xo keye de virazenê, erzenê tenûre. Zimistan de zî cuya ma dewam kena. Ma dewijî yewbînî rê rind ê û ma pêrûne de bextewar ê. Dewa ma zaf rind a.”
