Bedlîs – Evîndar û Fatma Kiliçarslane ke wayê yewbînan ê, mîyanê têkoşînê azadîye de cuya xo vîndî kerd. Her di wayan soz dabi yewbînan ke hetanî mergî pîya bê.
Evîndar û Fatma Kiliçarslane ke wayî yê, dewa Sulu ya qezaya Tetwanî ya Bedlîsî de keyeyêkê welatperwerî de ameyê dinya. Her di wayan seba azadî û şerefê şarê xo têkoşîn kerd û na ra de canê xo da. Evîndar serra 2013î de tevlîyê refanê gerîla bîye û serra 2016î de Gever de şerê xoserîye de şehîd kewte. Fatma zî serra 2013î de, 3 aşmî badê waya xo tevlî bîye, nameyê waya xo girewt û serra 2019î de Herêmanê Parastina Medyayî de şehîd kewte.
Dayîk Aysel Kiliçarslane û pî Îkram Kiliçarslanî derheqê cuye, têkoşîn û qerarê şîyayîşê refanê gerîla yê kênekanê xo Evîndar (Rojevîn Garzan) û Fatma Kiliçarslane (Delîla Rojevîn Garzan) de qisey kerd. Her di wayî serranê cîyayan de şehîd kewtê. Keyeyî dîyar kerd ke her di wayî domanîya xo ra nat wayîrê helwestêko welatperwer bîyî û rayîrê azadîye de bîyî yew.
‘A hem embaza ma hem zî kêneka ma ya pîle bîye’
Dayîk Aysel Kiliçarslane da zanayîş ke Evîndar domanîya xo de zî zaf zana û wayîrê helwestî bîye û vîrameyîşê xo yê ê wextî wina qal kerdî: “Cuya Evîndare ya keye de zaf baş bîye. A hem embaza ma hem zî kêneka ma ya pîle bîye, mi aye ra zaf hes kerdêne. Mi tu rey nêverdêne ke karanê keyeyî de bireteye. Mi û pîyê aye vatêne, wa a tena mektebê xo biwano û bibo cinîyêka zana. Evîndare badê ke unîversîte qezenc kerde, şîye Îstanbul, la hema serra xo nêqedênaybî, tevlîyê refanê gerîla bîye. Wexto ke Evîndar şîye, ma texmîn kerdêne ke a do tevlî bibo; wexto ke qije bîye zî her tim tevlîbîyayîşî ser o fikirîyêne. Têkilîya aye wayan û birayanê aye reyde zaf baş bîye. Her di wayan bê yewbînan îdare nêkerdêne. Pîya vatêne ‘hetanî merdişî zî ma pîya yê’. Pîyê aye ame destbendkerdiş, a ê wextî qije bîye û dewlete ma zaf aciz kerdêne. Her tim ameyêne keyeyê ma ser. Aye destbendkerdişê pîyê xo bi çimanê xo dîbi û no çî aye ser o tesîrêko pîl kerdbi.”
‘Soz dabi yewbînan û tevlî bîyî’
Aysel Kiliçarslane behsê şîyayîşê kêneka xo ya diyine Fatma zî kerd û wina vat: “Mi bawer nêkerdêne ke kêneka mi ya qije destê mi verdo û şiro. Hîrê aşmî badê Evîndare, Fatma zî tevlî bîye. Wexto ke Fatma şîye, ez zaf dima ra gêraya, la wexto ke waya aye şîye, ez dima ra nêgêraya. Fatma vatêne ‘mi nêeşkêne vindera, waya mi zî şîya, ma pîya soz dayo, a kotî bo ez zî do aye reyde bîya.’ Ez şîya, mi Fatma dîye û mi va ‘kêna mi, bêre ma şêrê keye’, aye va ‘ney dayê, şoriş newe dest pêkerdo, ti çi vana, ez nêyena’. Ma va baş o, ma rayîr da û ma ameyî.”
Aysel Kiliçarslane peynîya qiseykerdişê xo de dîyar kerd ke ê wazenê Rayberê Şarê Kurd Abdullah Ocalan azad bibo û heme hepsîyê sîyasî bêrê azadkerdiş û qiseyê xo wina qedêna: “Cigera dayîkanê eskeran zî sey ma vêşena. Ma êdî nêwazenê ke dayîkî bibermê, êdî bes o. Ma serberz ê, anîya ma akerde ya û ma verê heme şehîdan de ser çemnenê.”
‘Zext û koçberîya serranê 90an û tesîrê aye yê domanan ser’
Pî Îkram Kiliçarslanî zî dîyar kerd ke serranê 90an de sebebê vengkerdişê dewan ra koçberî bîye û zextanê keyeyî ser domanan ser o tesîrêko pîl kerdo. Îkram Kiliçarslanî ard ziwan ke ê wextêk şîyê Îstanbul û nêzdîyê 4-5 serran uca mendê û wina vat: “Sebebê şîyayîşê ma yê Îstanbulî no bî ke dosyayêk mi ser o est bî û mi nêwaştêne ke ez bêra destbendkerdiş. Evîndare uca dest bi mektebî kerd, hetanî sinifa 1, 2 û 3 uca wend. Dima ma agêrayî û Evîndare unîversîte qezenc kerde, beşê sosyolojî wendêne. La hema serra xo nêqedênaybî, tevlîyê refanê gerîla bîye. Serra 2016î de Gever de şerê xoserîye de şehîd kewte. Wexto ke ma cenazeya aye arde, astengê pîlî vetî, waştêne ma bêveng defin bikerê, la ma qebul nêkerd. Ma cenazeya şehîda xo bi merasîmêka bişerefe defin kerde.”
‘Fatma badê Kobanî şîye koyan û şehîd kewte’
Îkram Kiliçarslanî behsê Fatma zî kerd û qiseyê xo wina qedêna: “Wexto ke Fatma şîye, 18 serre bîye û lîse qedênaybî; a zî tevlîyê refanê gerîla bîye. Wexto ke şîye, vîyarte Başûr. Dima wexto ke şerê vera barbaranê DAÎŞ’î dest pêkerd, a şîye Kobanî. Wextêk uca menda, hetanî ke ê barbarî mintiqa ra ameyî vetiş. Bi saya ê qehremanan Kobanî nêkewt; dima a vîyarte koyan. Par ma xebera şehadetê aye eşnawite; a serra 2019î de şehîd kewta. Ma cenazeya Fatma nêgirewte, a embazanê aye het de ya. Ez nêzana ke proses senî beno, ma wazenê rojêk cenazeya aye biyarê dewe û defin bikerê.”
