Çewlîg – Tepîşte Hîkmet Çalagan ke Hepisxaneyê Mereşî de tepîşte yo, ganî 2023î de biameyêne veradayene la seba ke înfazê ey ame veşnayene, 33 serrî yo ke hepisxane de yo. Birayê Hîkmet Çalaganî Fîkret Çalaganî bale ante prosesê haştî ser o û vat: “Prosesê haştî bibo zî înfazê înan ameyo veşnayene, nêyenê veradayene.”
Mehkemaya Qanûna Bingeyîne (AYM), texlîye nêkerdişê Çalaganî sey îhlal qabul kerd la reyna zî Çalagan texlîye nêamekerdene.
Hîkmet Çalagan, teşrîna peyêne ya serra 1993î de Îstanbol de amebi destbendkerdene. Çalagan, Mahkemeya Ewleyîya Dewletî (DGM) de ame mahkemekerdene û bi îdiaya “Xirabe kerdişê yewîya dewlete” ci rê cezaya hepisê muebbetê ameyê birnayene.
Hîkmet Çalagan, nê 33 serran de zaf hepisxaneyî dî, nika hepisxaneyê Tîpê L î ya 2. yê Mereş Turkoglu de yeno tepiştene û cezaya xo ya 30 serran yê infazê qedênaya la reyna zî texlîye nêkenê. Sebebê dergkerdişê texlîyeya Çalaganî de “cezayê hucreyî/dîsîplînî” yenê nîşandayene.
Avukatê Çalaganî Alîşan Şahin, serra 2023î de seba texlîya nêkerdişê muvekîlê xo dosya berde AYM. Serra 2024î dê AYMyî texlîye nêkerdişê Çalaganî sey îxlalê qanûnê bingeyînî qabul kerd. La hîna zî Çalagan nêamo texlîyekerdene.
Na babete ser birayê Hîkmet Çalaganî Fîkret Çalaganî ajansê ma rê qisey kerd.
‘Înfazê birayê mi 5 serrî ameyo veşnayiş’
Fîkret Çalaganî vat înfazê birayê mi 5 serrî ameyo veşnayiş û wina domna: “Ma saba nê qerarê bê huqûqî 2023 de îtîrazê AYMî kerd û AYMyî zî mîyanê serra 2024î de taxlîye nêkerdişê birayê mi sey îhlal qabul kerd. La reyna zî birayê mi nêno texlîyekerdene. La Hakîmîya înfazî sey xo kerd û qerarê AYMyî nêşinasna. Texlîya nêkenê la cayê durî ra zî nîyanê cayanê nêzdîyan.”
‘Pîyê mi vano ez veradayişê lacê xo bivînî dima ra bimirî’
Fîkret Çalagan bale ante ser prosesê aştî û vat: “Seba ke prosesê aştî esto la no prosesê kesike 2005 de ameyê tepiştiş, înan veredanê, la birayê mi xo ra ceza xo qedênaya, bê nê qanûnî zî gerê birayê mi bêro raverdayene. No proses madem prosesê aştîye yo ganî hindê Înfazê girewtêyan nêro veşnayiş. Maya mi bi hesreta nêdîyayişê birayê mi merde. Aye tim vatêne ez vêjîyayişê lacê xo bivênî ay ra dima şîra heqîya xo. La aye vejîyayişê lacê xo nêdî. Nika zî pîyê mi vano ez veradayişê lacê xo bivînî dime ra bimirî. O zî nêweşo, vano wa lajê mi vejîyo ez bivêînî û dime ra bimirî. Ez vana maya mi veredayişê birayê mi nêdî wa Pîyê mi bivêno.”













