Enqere – Dayika Aştiyê Afife Kartal ku bi Serokê Meclisê Numan Kurtulmuş re hevdîtin kiribû tekildarî hevdîtinê da zanîn ku wê di hevdîtinê de daxwaza azadiya Rêberê Gelê Kurd Abdullah Ocalan kiriye û got: “Numan Kurtulmuş jî ji me re got; di demekê nêz de ez ê li Amedê serdana Komeleya Dayikên Aştiyê bikim.”
Meclisa Dayikên Aştiyê ku nêzî 300 dayikan pêktê ji 24 bajarên Bakurê Kurdistanê û Tirkiyeyê bi daxwaza azadiya fizîkî ya Rêberê Gelê Kurd Abdullah Ocalan û avêtina gavên şênber ji bo pêvajoya Aştî û Civaka Demokratîk hatin Enqereyê. Dayikên Aştiyê di serî de li ber meclisê hatin ba hev û bi daxuyaniyeke daxwazên xwe anîn ziman. Piştre jî li parka Kurtuluşê kon vegirtin û dest bi nobedê kirin. Dayikên Aştiyê piştî nobedê duh û îro serdanên bi partî û rêyedarên dewletê re domandin.
Dayikên Aştiyê li meclisê serdana Yenî Partî, Koma Yenî Yol, MHP, CHPê û AKPê kirin. Piştî serdanên partiyên siyasî Dayikên Aştiyê bi heyeteke serdana Wezîrê Dadê Akin Gurlek kirin û di hemû hevdîtinan de dosyayeke Kurdî û Tirkî ku daxwazên dayikan di nav de bû radestî partiyên siyasî û Wezîre Dadê kirin. Piştî hevdîtinan Dayikên Aştiyê ji bilî heyeta ku dê bi Serokê Meclisê Numan Kurtulmuş re hevdîtin bike vegeriyan bajarên jê hatibûn.
Heyeta Dayikên Aştiyê ku ji Hanife Akpolat, Muzeyyen Butun û Afife Kartal pêk dihat li meclisê bi Serokê Meclisê Numan Kurtulmuş re jî hevdîtin kirin û daxwazên xwe anîn ziman. Her wiha dayikan dosyaya Kurdî û Tirkî ku daxwazên wan di nav de bû jî radestî Numan Kurtulmuş kirin. Piştî hevdîtinê heyeta Dayikên Aştiyê tekildarî serdana bi Numan Kurtulmuş re li ber meclisê daxuyanî dan.
‘Min ji Numan Kurtulmuş re got; Heta birêz Ocalan azad nabe aştî pêk nayê’
Yek ji Dayika Aştiyê Afife Kartal ku di nav heyeta bi Numan Kurtulmuş re hevdîtin kiribû de bû tekildarî hevdîtinê ji Ajansa Welat re axivî. Afife Kartal bi lêv kir ku wê di hevdîtinê de daxwaza azadiya fizîkî ya Rêberê Gelê Kurd Abdullah Ocalan kir û got: “Min jê re got heta birêz Ocalan azad nebe aştî pêk nayê. Şer jî ji meclisê destpê dike aştî. Min jê re got divê girtiyên nexweş demildest bên berdan. Me daxwaza berdana girtiyên siyasî kirin. Em dibêjin bila Rêberê Gelê Kurd Abdullah Ocalan demildest bê berdan û aştî pêk were. Em heta li vir hatine û em dixwazin dest vala venegerin.”
‘Numan Kurtulmuş got ew jî aştiyê dixwazin’
Afife Kartal di berdewama axaftina xwe de da zanîn ku Numan Kurtulmuş ji wan re gotiye ku dê di demekê nêz de li Amedê serdana komeleya wan bike û wiha dirêjî da axaftina xwe: “Me pir bi erênî pêşwazî kir. Numan Kurtulmuş got ew jî aştiyê dixwazin. Got em nikarin her tiştî di carekê de bikin lê hewl didin bi lezgînî pêvajoyê bi encam bikin. Bi me re pir xweş axivî. Ji me re got e wê di demekê nêz de were Amedê û serdana Komeleya Dayikên Aştiyê bike. Ji bo girtiyên nexweş jî ji me re got ew ê li ser bisekine. Em jî heta sax bin em ê daxwaza aştiyê bikin.”
