Mersîn – Hepisxaneyê Ewleyî yê Berze yê Ereglî de veradayîşê 7 kesan ame taloqkerdene û ame îddîakerdene ke cayê sporî de asbest ameyo dîyayene. Temsîlkarê OHD’yî yê Çukurova Avûkat Savaş Tanşirî vat: “Seba nê îddîayan ganî bi lez cipersayîş bêro kerdene.”
Tirkîya de çend serrîyo seba çareserkerdişê problemê kurdan “Prosesê Aştîye û Komelê Demokratîkî” dest pêkerd. Labelê eynî wextî de Tirkîya û Vakurê Kurdîstanî de hepisxaneyan de vera girewteyan îhlalê heqan ê cîddî dest pêkerdî. Nê îhlalan ra yew zî o yo ke girewteyî cezayê xo qedênenê, labelê îdare û Heyetê Çimdarî bi qanûnê “poşmanbîyayîşî” cezayê înan derg kenê. Heto bîn ra înkarê kamîyî, kesan bê îtibar kerdiş, mecbûrkerdişê şertanê xiraban û ca-ca tehdîdî zî estê.
No nêzdîbîyayîş provokekerdişê nê prosesî yo. Keyeyê girewteyan, huqûqnasan û TUHAY-DERî reaksîyon mojnayî, labelê hema zî teda û bêhuqûyê zindanan dewam kenê. Hepisxaneyê ke nê problemî tede est ê, nînan ra yew zî Hepisxaneyê Ewleyî yê Berze yê Ereglî yo. Hepisxaneyê Ereglî de, 2 aşmî nayera ver dozger ame vurnayene. Dozgero newe roja ke amo a roje ra natêrî serê girewteyanê sîyasîyan de teda û bêhuqûye kêmî nêkeno. Tena mîyanê 2 aşman de veradayîşê 7 girewteyanê sîyasîyan ame taloqkerdene. Nînan ra nameyê 6 kesan wina yo: Mehmet Mencîk, Haci Sincar, Mehmet Alî Taşli, Sînan Çelîk, Abdul Celîl Kaçmaz û Tahîrhan Kaya.
Seba na babete temsîlkarê OHD’yî yê Çukurovayî Pawitox Savaş Tanşirî ajansa ma rê qisey kerd.
‘Cayê sporî de asbest ame dîyayene’
Savaş Tanşirî vat ke 28ê teşrîna verêne de Hepisxaneyê Ewleyî yê Berze yê Ereglî zîyaret kerdo, problemê girewteyan goştar kerdo û no terz ra qisey kerd: “Gore beyanê girewteyan, bi vurnayîşê îdareyê hepisxaneyî ra pey, resayîşê xizmetanê weşîye, nirxnayîşê veradayîşî, têkilî û şertê însanî weşîye de îhlalê heqan ê cîddî dest pêkerd. Ame vatene ke îdare û Heyetê Çimdarî bi qanûnê ‘poşmanbîyayîşî’ zor danê, serê kamîyan de heqaret yeno kerdene, kesê ke cezaya xo qedîya veradayîşî înan ame taloqkerdene, dilekçeyî bê cewab mendî, çalakîyê pîya û havalandirma ameyî sînordarkerdene. Girewteyê nêweşî resayîşê tedawîyî û nêweşxane de zehmetî ancenê, muayene de mecbûrê kelepçeyî kenê, û tersnenê. Ame îddîakerdene ke girewteyê kanser û nêweşîyê bînî yê cîddî estê, tedawîyê inan nêmcet maneno û waştişê kursîyî yê seba havalandirma ameyo qedexekerdene. Seba çareserkerdişê nê probleman mudaxeleyêko lez lazim o. Ame îddîakerdene ke cayê sporî de maddeyê asbestî ameyo dîyayene. Zanino ke asbest maddeyêko bi zehîro û serê weşîya merdimî de tesîrêko xirab virazeno. Seba nê îddîayan ganî bi lez cipersayîş bêro kerdene.”
‘Ganî girewteyanê nêweşan rê tedawîyo bêmabên bêro kerdene’
Savaş Tanşirî vat ke ganî maqamê mesûlî nê îdiayan bigêrê cidi û goş bidê serê waştenanê girewteyan û bi lez çareser bikerê û wina dewam kerd: “Ganî girewteyanê nêweşan rê tedawîyo bêmabên bêro kerdene; şîroveyê şertanê veradayîşî û taloqkerdişê înfazî seba her kesî yew bi yew û gore huqûqî bêrê nirxnayene. Qedexeyê ke seba peywendî, resayîşê agahî û heqanê cematî yê pîya vera huqûqî ê, ganî bêrê wedarnayene; netîceyê teftîşî ganî bi raya pêroyî ra bêrê parekerdene.
Prosesê Aştîye û Komelê Demokratîkî ke yew serre ra zêdeyêr o ajandaya bingehîne ya welatî ya, ez vînena ke seba ke proses biresero armancê xo yê bingehînî, ganî pêro hetî erk û mesûlîyetê xo bîyarê ca. Na rewşa nê hepisxaneyî, vera rewşa estîye, provokasyon a.”
“Gamê hiqûqî û sîyasî yê ke lazim ê ganî bi lez bêrê eştene”
Savaş Tanşirî ard vîr ke PKK 26ê teşrîna verêne ya 2025î de Kongreya xo ya 12ine de xo fesh kerd û qiseyê xo wina qedêna: “No averşîyayîş, seba aştîya komelî, huqûq û demokrasî zî, sey nuqteyêka muhîm a ganî bêro nirxnayene; gamê hiqûqî û sîyasî yê ke lazim ê ganî lez bêrê eştene. No çarçewe de, Pêşnîyazê Qanûnî yê Qewetkerdişê Piştîpêdayîşê Neteweyî û Yewbîyayîşê Komelî, ke ‘Qanûnê Proses’ vîyeno nasnayene, 10ê tebaxe ya 2026î de Kombîyayîşê Pêroyî yê Meclîsa Girdîya Neteweyî ya Tirkîya (TBMM) de bi raydayîş ame qebulkerdene; labelê merhele de ke ma resayî, ganî hema nîka gamê lazim bêrê eştene ke pratîkê nêheqî yê idareyê hepisxaneyan prosesî nêşikinê. Seba ke şîdet nê, sîyaset; ceng nê, çareserkerdişê demokratîk ver ra bo, ganî nê gamî bi semîmîyetî bêrê piştîdayene. Çike aştî tena bi vindertişê çekan nêbena, bi nasnayîşê heqanê demokratîkan û hemwelatîbîyayîşê seypê beno.”
