Welatiyên ku tev li Kongreya Rêxistina DEM Partiyê ya Wanê bûn anîn ziman ku heta azadiya fîzîkî ya Rêberê Gelê Kurd Abdullah Ocalan pêk nayê, pêvajo bi ti awayî bi pêş ve naçe û nagihîje encamê.
Rêxistina DEM Partiyê ya Wanê Kongreya Xwe ya 3yemîn a Asayî bi tevlibûneke girseyî û coşeke mezin li dar xist. Welatiyên ku tev li kongreyê bûn, derbarê Pêvajoya Aştî û Civaka Demokratîk de ji ajansa me re axivîn û destnîşan kirin ku garantiya sereke ya çareseriyeke mayînde azadbûna Rêberê Gelê Kurd Abdullah Ocalan e.
Welatiyan anîn ziman ku gelê Kurd her tim ji bo aştiyê amade ye, lê belê heta ku azadiya fîzîkî ya Rêberê Gelê Kurd Abdullah Ocalan pêk neyê û mercên xebatê yên azad ji bo wî neyên sazkirin, ev pêvajo bi ti awayî bi pêş ve naçe û nagihîje encameke rasteqîn.
Welatiyan bal kişand ser rola diyarker a Abdullah Ocalan û diyar kirin ku ji bo avakirina baweriya civakî divê desthilat tavilê gavên şênber biavêje, polîtîkayên qeyim bi dawî bike û daxwazên azadiyê yên girtiyên siyasî bicih bîne.
