KJK’yî dîyar kerd ke hêrişê vera Rojava wazenê prosesê aştî û azadîye û modelê cuya hempare ya şaran bişiknê. KJK’yî venga têkoşîn û wayîrvejîyayîşê Rojava da.
Koordînasyonê Komelanê Cinîyanê Kurdîstanî (KJK) derheqê hêrişanê vera erjanê Rojavayê Kurdîstanî de eşkerayîyêka nuştekî weşanaye. KJK’yî destpêkê eşkerayîye de şexsê cangorîyanê Rojava de heme cangorîyê şorişî vîr ardî û keyeyanê înan rê serweşî waşt. KJK’yî vîr ard ke şarê kurdan vera sîyasetanê qirkerdiş û dagîrkerîye bi bedelanê giranan têkoşîn kerdo û wina vat: “No têkoşîno ke ma bi pêşengîya cinîye kerd, rayîrê şorişan û vurîyayîşê komelkî akerd. Şorişê Cinîye yê Rojava sey sewîyeya tewr berze ya mîras û arêbîyayîşê tarîxê têkoşînê cinîye û têkoşînê ma yê 53 serran ame ca. Şervananê azadîye bi pêşengîya cinîyanê kurdan vera çeteyanê DAÎŞ’î mojna ke cuyêka alternatîfe eşkena bêro awankerdene.”
‘No hêriş vera Prosesê Aştî û Komelê Demokratîkî ame kerdene’
Eşkerayîye de ame vatene ke vera cinî û şarê Rojava sîyasetê qirkerdişî û tehlukeyî dewam kenê: “Hêrişê ke Heleb de dest pêkerd û Kobanî û Hesekê de dewam kerd, vera erjanê demokrasî û azadîye yê ke bi pêşengîya cinîye ameyî afirnayene. No hêriş vera Prosesê Aştî û Komelê Demokratîkî ame kerdene ke Rayber Apoyî 27ê sibata 2025 de da destpêkerdene. Berpirsîyarê nê hêrişan şarê qedîmî yê Sûrîye nîyê; Hukmatê Şamî, hemkar û çeteyê înan ê. Dewleta tirke û hêzê mîyanneteweyî zî semedê ke piştîdayîşê sîyasetanê hêrişkarîye kenê yan zî hêrişan asteng nêkenê, eynî sewîye de berpirsîyar ê.”
‘Wazenê bi provokasyon û komployan şaristanan dagîr bikerê’
KJK’yî dîyar kerd ke remnayîşê merdiman, kiştişê înan semedê nêdayîşê fîdyeyî û destdergîya erjanê şehîdan israrê şer û sîyasetê qirkerdişî yo: “Çîyo ke bi metodanê dagîrkerîya leşkerî nêeşkayî bikerê, nika wazenê bi provokasyon û komployan, bi şerê psîkolojîk û taybetî bikerê û şaristanan dagîr bikerê. Hêrişê qilêrinî yê ke rojan o Hesekê de vera erjanê şarê kurdan yenê kerdene, provokasyonêko eşkera û sîyasetê bêkurdverdayîşê herême yo. Sey xoverdayîşê Kobanî û Bendê Tişrînî, no xoverdayîş û ruhê yewîya şaranê demokratîkan do ser bikewo. Coka şar û cinîyê Rojava bi berpirsîyarîyêka tarîxîye reyde rîbirî yê ke estbîyayîş, azadî û sîstemê xo yê komelê demokratîkî bipawê.”
‘Hêrişê vera Rojava vera heme kurdan, cinîyanê kurdan û heme merdimîye yo’
KJK’yî îfade kerd ke her hêrişo vera Rojava, vera heme kurdan, cinîyanê kurdan û heme merdimîye yo. Peynîya eşkerayîye de wina ame vatene: “Vera nê hêrişan şarê Vakur, Başûr, Rojhelat û Rojava mecbur ê ke no planê mîyanneteweyî bêtesîr verdê. Ewro roja xurtkerdişê yewîya neteweya kurdan a demokratîke ya dorûverê Rojava û roja têkoşînî ya. Ganî cinîyê kurdan koti de benê wa bibê, sewîyeya seferberîye de wayîrê Şorişê Cinîyan yê Rojava vejîyê. Ma têgêrayîşêê komelê demokratîkî dawet kenê ke verê qirkerdişê kurdan bigîrê ke nê rojan şexsê Hesekê de provayê ey yeno kerdene û bibê vengê şarê Rojava.”
