Hemserekê MED TUHAD-FED’î Kerem Canpolatî derheqê tedaya hepisxaneyan de vat ke eke behsê cuya hempare û aştîye bibo ganî no ewilî hepisxaneyan de xo bimojno. Ey dîyar kerd ke dewlete heta nika gamêka şênbere nêeşta.
Prosesê Aştî û Komelê Demokratîkî nêzdîyê di serran o dewam keno. Proses 27ê sibate de bi vengdayîşê Rayberê Şarê Kurdî Abdullah Ocalanî dest pêkerd. La proses hema hepisxaneyan de xo nêmojneno. Hepisxaneyanê Tirkîya û Vakurê Kurdîstanî de tecrîd, teda û binpaykerdişê heqanê tepîşteyanê sîyasîyan dewam kenê. Bi seyan tepîşteyê nêweşê giranî pawenê ke bêrê tedawîkerdiş û verdayîş. Hemserekê MED TUHAD-FED’î Kerem Canpolatî derheqê rewşa hepisxaneyan de Ajansê Welatî (AW) rê qisey kerd.
Komeleya Heqanê Merdiman (ÎHD) 28ê nîsane de Amed de raporêk eşkera kerd. Goreyê raporî, hepisxaneyan de hezar û 412 tepîşteyê nêweşî est ê; înan ra 161 cinî yê, hezar û 251 zî camêrdî yê. 230 tepîşteyê nêweşê giranî nêeşkenê bi tena biciwîyê. Goreyê melumatanê MED TUHAD-FED’î zî 400 tepîşteyê nêweşî est ê û înan ra rewşa 155an giran a.
Canpolatî dîyar kerd ke nêzdîbîyayîşê îdare û dewlete hepisxaneyan de hema nêvurîyayo: “Serr û nêm o ke proses dewam keno, la rewşa hepisxaneyan û tepîşteyan de tu vurîyayîş çin o. Zaf cayan de îdareyê hepisxaneyî tepîşteyan tehdît kenê, nêweşan nêerşawenê nêweşxane; gardîyanî zî bi qiseykerdişê xo tepîşteyan tehdît kenê. Tayê cayan de îdare vano: ‘Prosesê nikayî ma eleqedar nêkeno.’ Ma nê meseleyan ser o hetan reyde pêvînayîşî kerdî. Înan ma rê vat ‘ma do çareser bikerê’ zî rewşe hema nêvurîyaya.”
‘Tepîşteyê sîyasî no nêzdîbîyayîş qebul nêkenê’
Canpolatî îfade kerd ke hepisxaneyanê Vakurê Kurdîstanî û Tirkîya de heqê merdiman û heqê xozayî yenê binpaykerdiş. Ey wina vat: “Ma peynî de Ankara de çalakîyêk da destpêkerdiş. Destpêke de zehmetî vejenê la ma do çalakîya xo dewam bikerê. Ma mecbur ê ke heme Kurdîstan û Tirkîya de nêrazîbîyayîşê xo bimojnê. Nêweşî nêbenê doktor û nêweşxane; wexto ke benê zî destanê înan kelepçeyan ra anêkenê û wazenê fekê înan kontrol bikerê. Zanenê ke tepîşteyê sîyasî no nêzdîbîyayîş qebul nêkenê; coka bi zanayîş nê çîyan kenê.”
‘No sîyasetê dewlete yo û verî ra dewam keno’
Canpolatî vat ke no nêzdîbîyayîş tena îdare yan dozgerîye ra girêdayî nîyê, sîyasetê dewlete yo: “Eke behsê birayîye, cuya hempare û aştîye beno, ganî no ewilî hepisxaneyan de xo bimojno. La heta nika dewlete û Wezîrê Edaletî tu gama şênbere nêeşta.” Canpolatî dîyar kerd ke înfazê tepîşteyan yenê veşnayîş; tede tepîşteyê ke 30 serran ra nat hepisxane de yê û cezaya înan qedîyaya zî est ê. Goreyê Canpolatî, tepîşteyî hucreyan ra nêyenê vetiş û nêverdîyenê ke beşdarê xebatanê komelkîyan bibê; dima zî bi no sebeb înfazê înan yenê veşnayîş. Canpolatî vat ke heyetê Îmrali reyde nê meseleyan ser o pêvînayîşê înan bîyî: “Wezîrê Edaletî ma ra nameyî waştî, la hema gameeştişêko şênber çin o.”
