Hevserokê DBPa Amedê Ahmet Dogan û Hevserokê MED-TUHAD FEDê Kerem Canpolat, komploya 9ê Cotmehê şermezar kirin û banga tevlibûna meşa 9ê Cotmehê ya ku dê li Amedê bê lidarxistin kirin.
Platforma Saziyên Demokratîk ya Amedê ji ber komploya navneteweyî ya 9ê Cotmeha 1998an a li dijî Rêberê Gelê Kurd Abdullah Ocalan hate destpêkirin, dê di 9ê Cotmehê de bi dirûşma “Bi şîara ji bo statu, aştî û azadiyê meşa ji birêz Ocalan re azadî” ji ber avahiya Ncityê ya li navçeya Rezanê heya ber AZC Plaza ya li semta Ofîsê ya Amedê meşekê li dar bixin. Hevserokê DBPa Amedê Ahmet Dogan û Hevserokê MED-TUHAD FEDê Kerem Canpolat derbarê meşa ku dê ji bo komployê bê lidarxistin banga tevlibûnê kirin.
‘Ji bo peyamekê bidin hêzên hegemon divê wekî lêhiyê tev li meşê bibin’
Ahmet Dogan da zanîn ku komploya navneteweyî ne tenê li dijî Rêberê Gelê Kurd, ew li dijî hemû gelên Rojhilata Navîn pêk hatiye û ji bo meşa 9ê Cotmehê ji gelê Amedê re ev bang kir: “Komploya li ser Serok Apo hat meşandin, ne tenê herêmî, komployeke navneteweyî bû. Em bi awayekî vekirî dikarin bêjin ku komploya li ser Rêber Apo pûç bû. Bi têkoşîna gelê Kurd, bi têkoşîna dostên gelê Kurd, bi têkoşîna li herêma Kurdan ev komplo pûç bû. Lê belê pêvajoyeke nû destpêkiriye, pêvajoyeke civaka demokratik. Ji bo ev komplo bi temamî ji holê bê rakirin, divê em li dora Rêber Apo, sazî û dezgeh û partiya xwe bibin xelekek ji agir û vê komployê bi temamî têk bibin û biqedînin. Ji ber vê yekê em ê roja înê, 9ê Cotmehê ji bo komployê şermezar bikin bi awayekî girseyî bi gelê xwe re bimeşin. Ji bo ku em peyamekê bidin hemû hêzên hegemon û cîhanê lazim e bi girseyî, weke lehiyê tev li vê meşê bibin û vê komployê şermezar bikin.”
‘Bi têkoşîn û felsefeya birêz Ocalan ev komplo pûç bû’
Kerem Canpolat diyar kir ku armanca komployê ew bû ku deng û rengê gelê Kurd û hêviya hemû gelên li Rojhilata Navîn biqedînin û wiha axivî: “Em tev zanin ku Birêz Ocalan bi têkoşîn, gotin, nêrîn, felsefe û paradigmaya xwe ji gelê Rojhilata Navîn re hêvîyeke û pêşeroja hemû gelan vedike. Tişta ku dagirkeran xwest pêk nehat û bi têkoşîn û felsefeya birêz Ocalan ev komplo pûç bû. Wekî hûn dizanin pêvajoyeke çareseriyê jî heye, em dixwazin gelê Amedê bi sed hezaran li kolanan bimeşin. Bi gotina xwe, bi rengê xwe, bi dengê xwe, bi ala xwe piştgiriya çareseriya mezin a Kurd û vê pêvajoyê bikin. Xwedî derketina birêz Ocalan xwedî derketina jiyaneke nû ye û ji bo êdî ji vê erdnigariyê kuştin çênebe û ji bo derketina hemû zarokên Kurdan yên ku li zindanan de ne. Divê hemû gelê Amedê 9ê Cotmehê tev li meşê bibin û destê xwe bidin destê me û piştgiriya aştiya ku bi pêşengtiya birêz Ocalan de dimeşe bikin.”
