AMED – Rayberê Komeleya Nuştoxanê Kurdan Ahmet Tamîrî ke îmzakaranê deklarasyonê “Seba Komara Demokratîke û Aştîye 1001 Îmzayî” ra yew o, dîyar kerd ke Rayberê Şarê Kurdan Abdullah Ocalan cehd keno problemî bi rayîrê aştîye çareser bikero û vat: “Ma çend ke bibê vengê nê vengdayîşî, hende do bireso amancê xo. Ganî statuyê Rayberê Şarê Kurdan bêro naskerdene.”
Îstanbul de bi pêşengîya cinî, roşnvîr, hunermend, akademîsyen, karker û ciwanan deklarasyonê “Seba Komara Demokratîke û Aştîye 1001 Îmzayî” ameybî eşkerakerdene. Îmzakaran hemwelatîya seypêye, caardişê qeraranê Dadgehê Heqanê Merdiman ê Ewropa (DHME) û naskerdişê “heqê hêvî” waştî. Ahmet Tamîrî derheqê deklarasyonî de ajansa ma rê qisey kerd.
“Ganî fikrê azadîye komelî de vila bibo”
Ahmet Tamîrî vat ke amancê îmzayan komel de awankerdişê aştîyêka domdar o: “Amancê ma no yo ke fikrê demokrasî û azadîye komelî de vila bibo û komel pêro bi nasname û bawerîya xo biciwîyo û xo rêxistin bikero. No seba ma nuştoxan zî ferz o; çunke nuştoxî pêşengê komelî yê.”
“Rayberê Şarê Kurdan cehd keno ke problemî çareser bikero”
Tamîrî vat ke ê hêvîdar ê ke proseso ke Birêz Ocalanî dayo destpêkerdene, do ser bikewo: “La ewro sîyaset komelî de bêbawerîye virazeno; Tirkîya de sîyaset goreyê menfeetan hereket keno. Wa ê zî rind bizanê ke Birêz Ocalan cehd keno ke no problem bi rayîrê demokrasî û aştîye çareser bibo.”
“Ganî berê Îmraliyî bêrê akerdene”
Tamîrî dîyar kerd ke seba ke Têgêrayîşê Azadîya Kurdîstanî gamê muhîmî eştê, dewlete rê tu bahane nêmendo û wina vat: “Sey nuştoxan ma zî vanê, wa berê Îmraliyî bêrê akerdene. Ganî statuyê Rayberê Şarê Kurdan bêro naskerdene û Birêz Ocalan fikranê xo heme kesan reyde pare bikero. Wa kes bêhêvî nêbo; hêvîya ma hêzê ma de ya. Komel çend ke xo biserûber rêxistin bikero, no waştişê aştîye hende do bêro ca.”
