Hûmara teşrîna verêne ya Rojnameyê Komînal bi manşetê “Fehmê înkarî de vurîyayîş çin o” vejîyaye. Hûmare de roportajê Duran Kalkanî yê Prosesê Haştîye û Komelê Demokratîkî ser o, têkilîyê kurd û tirkan û averşîyayîşê Rojhelatê Mîyanênî ameyî erjnayene.
Rojnameyê Komînal ke Ewropa de aşme de reyêk sey rojnameyêko îdeolojîk, teorîk û polîtîk vejîyeno, hûmara xo ya teşrîna verêne weşanaye. Manşetî de roportajê endamê Akademîya Zanistanê Komelkî ya Abdullah Ocalanî Duran Kalkanî ca gêno.
Kalkanî vat ke sîstemê mewcûdî de komara demokratîke û sîyasetê demokratîkî çin ê: “Vajîyeno ke ma bivurnê, la fehm û sîyasetêko ke vurnayîş bikero çin o. Hema fehm û sîyasetê ke kurdan înkar kenê de vurîyayîşêko cidî çin o. Bi serê ziwanî vajîyeno ke kurd est o, la kamcîn kurd? Şarê kurdan nêyeno tarîfkerdene.”
Kalkanî derheqê Qanûnê Çarçewe de vat: “Qanûn bi rêjeyêka zaf girde nêgêno PKKyî xo mîyan. Rayber Apo û 800 qadroyanê ey nêgêno xo mîyan. Wina aseno ke qanûn seba hetgiranê PKKyî vejîyayo.” Kalkanî derheqê îdîayanê “vîlla”yî yê Îmraliyî de zî vat ke wa berê Îmraliyî akerê û çapemenî û dezgehê bînî şêrê uca bivînê.
Kalkanî vat ke proses nêşeno bi çekuyanê bêmanayan ê sey “bêçekbîyayîş” û “stratejî” biramîyo: “Coka nameyê heyetê ke do proses biramo, ganî ‘Koordînatorîya Haştîye û Sîyasîbîyayîşî’ bo û ganî wezîfeyê koordînatorîye Rayber Apo bigîro.”
Hûmare de nuşteyê Hêlîne Umît, Cîhan Eren û Cemal Şerîkî û şîîra kurdkî ya Şehîd Zemanî (Mustafa Gezgor) zî ca gênê. Rojname 15ê her aşme de bi kurdkî û tirkî kominalgazete.com ser o yeno wendene.
