Weşanxaneyê kurdkî yê ke Fuarê Kitaban ê Amedî de ca gênê, dîyar kerd ke eke ziwan nêreso neslêko bîn, ver bi vindîbîyayîşî şino. Înan waşt ke tena serre de reyêk ney, her ca de wayîrîya kitabanê kurdkî bêro kerdene.
Fuarê Kitaban ê Amedî yo 10. ke hetê DTSO û TUYAP’î ra Merkezê Fuar û Kongreyî yê Mîyanneteweyî yê Mezopotamya de ame organîzekerdene, roja xo ya 6. de dewam keno. Nê rojan de bi hezaran kesan fuar zîyaret kerd û kitabî herînayî. Nuştox Bahoz Baran, endamê Weqfê Mezopotamya Îhsan Ay û endamê Enstîtuya Kurdî ya Amedî Murat Bîlgîçî ajansa ma rê qisey kerd.
Bahoz Baranî vat ke bi hezaran domanê kurdan ameyê fuar, zanê ke kitabî kurdkî yê, la nêzanê biwanê: “Çunke perwerde nêdîyo. Ewropa de domanî zafziwanî yê, hîrê-çar ziwanan zanê. La tîya seba sîstemêkê perwerdeyî yê xeletî, domanê kurdan rê tena yew ziwan ameyo musnayene û ziwanê dayîke vîr ra şîyo.”
Baranî waşt ke heme şaredarî kitabxaneyanê xo de ca bidê berhemanê kurdkî: “Tena serre de reyêk fuar de ney, ganî her ca de wayîrîya kitabanê kurdkî bêro kerdene. Ganî şaredarîyê ma bi serûberî kultur, destan, sanike û meselokanê ma arê bikerê; çunke nê nika nêyenê arêkerdene.”
Murat Bîlgîçî vat ke hema ke ewro eleqe fuar rê goreyê serranê bînan kêmî bo zî, eleqe berhemanê kurdkî rê zêde yo. Bîlgîçî ard ziwan ke mamostayî domananê mekteban tena benê standanê tirkî: “Ma hêvî kenê ke nê domanî standanê kurdkî de bi berhemanê kurdkî, bi xeyalanê kurdkî dinyaya xo nas bikerê.”
Îhsan Ayî vat ke fuarê ewroyî de kêmanî zaf ê û tayê weşanxaneyê kurdkî beşdar nêbîyê: “Zaf dezgehê ma giranî nêdanê ziwanê kurdkî. Domanî yenê, ma înan reyde bi kurdkî qisey kenê, vanê ‘ma kurdkî nêzanê’. Eke ziwan nêreso neslêko bîn, ver bi vindîbîyayîşî şino.”
Ayî waşt ke heme dezgeh û sîyasetmedarê kurdan cuya rojane de kurdkî bixebitnê û şarî rê bibê nimûne: “Nika prosesêko newe est o; ganî waştiş no bo ke heta kurdkî nêbo ziwanê fermî û ziwanê perwerdeyî, game nêra eştene.”
