Projeya “Dengê Borî: Konserên Amîdayê” ku berhemên muzîka Kurdî yên ji borî heta îro li şûnwarên dîrokî yên Amedê, bi platformên dîjîtal digihîne guhdaran, bi beşa xwe ya nû berdewam dike.
Beşa ya konserên ku di heyama pandemiyê de li cih û warên cuda yên dîrokî yên Amedê dihatin lidarxistin, vê carê bi navê “Dengê Borî: Konserên Amîdayê II” tê lidarxistin. Beşa nû ya hebûnên çandî yên bajarên herêmê, berhem û hunermendên taybet ên zarava û devokên cuda yên Kurdî jî bigire nav xwe. Endamê Desteya Rêveberiyê ya Odeya Bazirganî û Senayiyê ya Amedê (DTSO) ku ji Xebatên Ziman û Çandê Berpirsyar e Farûk Korkmaz, derbarê beşa nû ya konseran de agahî dan û diyar kir ku ramana serî ya nû bi fikra bibîranîna Aram Tîgran dest pê kiriye. Farûk Korkmaz destnîşan kir ku wan piştre biryar girtine ku ev çalakiya bîranînê di çarçoveya Konserên Amîdayê de pêk bê û da zanîn ku li ser vê yekê rêza duyemîn a konseran bi rengê ku şûnwarên çandî yên bajarên herêmê jî bigire nav xwe hat plankirin.
‘Me xwest dewlemendiya çandî ya bêhempa bi amûrên cuda ragihînin’
Farûk Korkmaz di nirxandina rêza yekemîn a Konserên Amîdayê de ev tişt gotin: “Di çarçoveya ‘Dengê Borî: Konserên Amîdayê’ de li şûnwarên dîrokî yên wekî Keftên Hasûnî yên Farqînê, Kela Zerzevanê, Keftên Hilarê yên Erganiyê, Pira Malabadê ya Farqînê, Dêra Keldanî ya Surê û Kela Gelê bi giştî 7 bernameyên konserê hatin çêkirin. Me her konserek diyarî hunermendekî hêja yê muzîka Kurdî kir û berhemên wan hatin strandin. Me ev rêze li ser platformên dîjîtal belav kir. Amanca me ya vê xebata ku eleqeyeke mezin dît; naskirina hebûnên me yên dîrokî, awazên muzîka kurdî û hunermendên ku ev berhem afirandine bû. Her wiha me xwest dewlemendiya çandî ya bêhempa ya bajar û herêma xwe bi amûrên cuda ragihînin.”
‘Dengê Borî: Konserên Amîdayê II dest pê bikin’
Farûk Korkmaz diyar kir ku wan îsal ev xebat ji bo bibîranîna Aram Tîgran dest pê kiriye û rêza nû ya Konserên Amîdayê wê bibe xwedî taybetmendiyeke herêmî û wiha pê de çû: “Me îsal xwest ji bo bibîranîna Aram Tîgran û ji bo ku berhemên wî dîsa bighêjin guhdaran çalakiyekê çêbikin. Piştre me got ‘Çima em rêza Konserên Amîdayê nedomînin?’ Bi Aram Tîgran dest pê dike; em dixwazin hunermendên ku di hafizaya muzîka herêma me de cih girtine û berhemên bêhempa hiştine û keda wan dîsa li mekanên dîrokî bidin bihîstin. Di rêza yekem de em bi Amedê re sînordar mabûn. Di heyama nû de em ê bala xwe bidin ser hebûnên çandî yên bajarên herêmê, berhem û hunermendên herêmên cuda yên muzîka Kurdî. Bi vê nêzîkatiyê me biryar da ku rêza ‘Dengê Borî: Konserên Amîdayê II’ dest pê bikin. Weke rêza berê, em vê rêzê jî bi hevkarî û hevbeşiya Ma Musicê li dar dixin.”
Bi rêza nû re tê armanckirin ku mekanên dîrokî û çandî yên herêmê bi rêya muzîkê werin xuyakirin û daneheva muzîka Kurdî ya li herêmên cuda û hunermendên ku tevkariyê li vê mîrasê dikin werin nasîn.
Di pêşengeha pirtûkan de panela Aram Tîgran
Korkmaz her wiha da zanîn ku di çarçoveya Fûara pirtûkan a TUYAPê ku îsal cara 10emîn tê lidarxistin de, bi hevkariya DTSO û Ma Musicê wê paneleke taybet a li ser berhem û tevkariya Aram Tîgran a ji bo muzîka Kurdî bê organîzekirin. Panela bi navê “Dengê Azadîyê, Sembola Biratîyê: Aram Tîgran” wê di 2yê Cotmeha 2026an de di navbera saet 13:00-13:45an de pêk bê.
Di panelê de Evîndar Dulek dê moderatoriyê bike û nivîskar Kakşar Oremar, hunermend Delîl Dîlanar, Dilovan û Neşet Guçmen wê wekî axaftvan beşdar bibin.
