Xelatê Rojnamegerî yê 33. yê Mûsa Anter û Şehîdanê Çapemenîye Çand Amed de ame viraştene. Xelata Azadîya Çapemenîye ya Huseyin Aykolî emser raya yewina ke yena dayene û MEBYA-DER’î xelate girewt.
Xelatê Rojnamegerî yê 33. yê Mûsa Anter û Şehîdanê Çapemenîye, hetê Komela Rojnamegeranê Dîcle Firatî (DFG) ra, bi sloganê “Raştî teqez rayîrê xo vîneno” Çand Amedî de ame viraştiş. Na serre seba vîrardişê rojnameger Huseyîn Aykolî ke cuya xo ra bîyo, “Xelata rûmetê ya azadîya çapemenîye” ame dayene.
Hemsereka Pêroyî ya DBP’yî Çîgdem Kiliçgun Uçar, Hemşaredara Amedî ya Şaristanê Girdî Serra Bûcak, parlamenteranê partîyanê sîyasî, temsîlkaranê sazgehanê sîvîl, dayikê aştîye, xebatkaranê Çapemenîya Azade û xeylî kesî tewrê merasimî bîyî. Merasimî de sloganê “Şehîdî Nêmirenê” ame berzkerdene. Merasimê xelatdayîşî bi deqeyêk rêzgirewtişî dest pêkerd.
Badê rêzgirewtişî, Hemsereka DFG’yî Kesîra Onale qisey kerd û bale ante prosesê Aştî û Komelê Demokratîkî ser o û nê çî va: “Nêzdî di serrî yo ke ma prosesêko muhîm ê Aştî û Komelê Demokratîkî ra vîyarenê. Çi heyf ke hema zî zext û astengîyê ke verê çapemenîye de yê nêameyê kêmkerdiş. Ganî peynî polîtîkayanê zextan ke çapemenîye ser o ye bêro û gamê qanûnî yê hewceyî bêrê eştiş.”
Dima ra lajê Musa Anterî Dîcle Anterî qisey kerd û mesajêko ke seba pîyê xo Apê Mûsa nuştbi wend. Anterî kedkaranê Çapemenîya Azade ke cuya xo ra bîyê yad kerd.
Badê cû mesajê Hemserekanê Yewîya Resnayîşê Azade (YRA) Evîn Îbrahîm û Îdrîs Henanî ke amebi erşawitiş, ame wendiş. Mesajî de ame dîyarkerdiş ke çapemenîya azade rixmê heme zextan zî pey raştîye ya û wina ame vatene: “Ma sey Yewîya Resnayîşê Azade heme rojnamegeranê ke wezîfeya xo bi cesaret ca ardê selam kenê. Sewbîna beşdaran û xelat girewteyan 33. Xelatanê Musa Anter û Şehîdanê Çapemenîya Azade pîroz kenê. Seba înan zî serkewtiş wazenê. Ma teqez kenê ke wefadarîya tewr baş a mîrasê Apê Musa û şehîdanê eşkerakerdena azad rê, bi hawayêko profesyonel û berpirsîyar raştîye rê ca yena.”
‘Musa Anterî key qiseykerdêni, waştêne ey bêveng bikerê’
Badê mesajê ke ameyê wendiş, waya rojnameger Metîn Goktepeyî, Meryem Goktepeyî qisey kerd û wina vat: “Biraya mi Metîn seba ke xebera cenazeyêk virazo şîni û bi îşkence ame kiştene. Waştêne her warî de Mûsa Anter bêveng bikerê, la ey nuştişê xo û waştişê xo yê aştîye domna. Şagirtê ey, rojnamegerî ewro xeyalê ey gird kenê. Ez Mûsa Anter bi rêzdarî yad kena. Ganî merdim qet nuştişê raştîye û waştişê aştîya ra veranêdo. Xeyalê Musa Anterî, xeyalê biraya mi Metînî û xeyalê Gurbetellî zî no bi.”
Pîyê Nazim Dastanî bi sloganê ‘şehîdê nêmirenê’ vejîya sehneyî ser
Pîyê Nazim Dastanî ke Bakur û Rojhelatê Sûrîye de hevala xo ya karî Cîhan Bîlgîne reyde ame kiştene, Mehmet Alî Dastanî bi sloganê “Şehîdê Nêmirenê” vejîya sehneyî ser. Dastanî wina qisey kerd: “Ma sozêk da; dinya ma ser de bêro zî, ma do reyna xo ver bidê. Wa dost û dişmen zî bizanê; ma do serbikewê. Serkewtiş yê ma yo. Apê Musa û egîtê çapemenîya azade Nazim, Cîhan… Rojnamegerî birûmet, rûmetê ma yê. Şehîdê Nêmirenê.”
‘Ma do piştîdayîş û têkoşînê rêxistine gird bikerê’
Dima ra mesajê DÎSK Basin-Îşî ame wendiş. Mesajî de wina ame vatiş: “Pawitişê heqê şarî yê zanayîşê raştîye û awankerdişê vatişê xo yo. Sendîkaya DÎSK Basin-Îşî, têkalekê heme rojnamegeranê ke mîrasê Mûsa Anterî zindî verdanê, kevneşopîya çapemenîya azade domnenê û pey raştîye yê. Vera hişmendîya ke rojnamegerîye suc vîneno û fikirneno ke bi bêvengkerdişê rojnamegeran eşkeno raştîye bîyaro meydan, ma do piştîdayîş û têkoşînê rêxistine gird bikerê.”
Dima sînevîzyono ke hetê Komela Akademîya Sînemayî ya Rojhelatê Miyanenî ra amebi hedrekerdene û qalê têkoşînê Çapemenîya Azade keno, ame mojnayîş.
‘Ma xo vîr ra nêkenê! ma xo vîr ra nêkenê’
Dima ra mesajê cinîya Namik Tarancî, Derman Tarancî ame wendiş. Mesajî de no çî ame vatiş: “Bi bawerîya mi yê ameyoxêko adilane yo ke qelemî nêbenê bêvengkerdiş û tu raştî tarîtîye de nêmana; ez embazanê ke mîras, vatiş û hêzê qelema Mûsa Anterî û heme rojnamegeranê ke nê rayîrî de cuya xo ra bîyê, ganî verdanê, selam kena. Ma zanê ke rojêk do kiştoxî teqez hesab bidê. Bi nê hîssan, bihêrs û bawerîya ma ya ke qet kêm nêbena, ma reyna qêrenê: Ma xo vîr ra nêkenê! Ma xo vîr ra nêkenê.”
Xelatî ameyê dayiş
Badê qiseykerdiş û mesajan, merasimê xelatdayîşî dest pêkerd. Beşê xebera kurdî de rojnamegerê ma Nedîm Orûç û Heval Onkolî xelata Mansîyonî girewt. Beşê xebera tirkî de rojnamegera Evrenselî Fîlîz Gazî û Ozlem Temenayî, rojnamegera Yenîyaşamî Reyhan Hacioglû û rojnamegera Bîanetî Tûgçe Yilmaze, beşê xebera dîyayîşkî de rajnamegerê Ajansa Mezopotamya Emrûllah Acarî, beşê fotografî de rojnameger Ardil Batmazî, beşê karîkaturî de Mahmut Ûlusanî ke Hepîsxaneyê Ereglî yê Konya de yeno girewtene. Birayê ey xelate girewt. Xelata Azadîya Çapemenîye ya Huseyin Aykolî na serre raya yewine ame dayene û MEBYA-DER’î xelate girewt.
Badê xelatdayîşî, mejasê xebatkarê Çapemenîya Azade rojnameger Hayrettîn Çelîkî ke teberê welatî de yo, ame wendiş. Mesajî de wina ame vatiş: “Şexsê Apê Mûsa de heme şehîdanê Çapemenîya Azade, heme yad kenê, beşna xo verê înan de tewênenê.”
Merasimê xelatdayîşî bi antişê fotografan qedîya.
