Platformê Yewîya Neteweyî yê Cinîyanê Kurdan ê Ewropa ard ziwan ke Şorişê Jin Jîyan Azadî her çar hetanê dinya de bîyo vengê xoverdayîşê cinîyan: “Serewedartişê Jin, Jîyan, Azadî dewamê têkoşînê tarîxî yo ke cinîyanê kurdan ramito.”
Platformî bi munasebetê serrgêra çarine ya Şorişê Jin, Jiyan, Azadî ke bi qetlkerdişê Jîna Emînî dest pêkerd, eşkerayî daye. Eşkerayîye de ame vatene ke qetlkerdişê Jîna Mahsa Emînî yê 16ê êlule 2022î yê Tehranî serewedartişêk vet meydan ke demêko kilm de her çar hetanê dinya de bî vengê xoverdayîşê cinîyan û Jîna bîye sembolê têkoşînê vera teda, îqtîdarê pederşahî û şîdetê vera cinîyan: “La seba cinîyanê kurdan Jin, Jîyan, Azadî tena sloganê serewedartişê 2022î nîyo; no slogan bi mîrasê têkoşînê tarîxî yê cinîyanê kurdan girêdaye yo. Cinîyanê kurdan bi serran vera îşxalkerdiş, teda û îqtîdarê pederşahî têkoşîn kerd û pawitişê nasname, ziwan û azadîya komelî de rolêko taybetî girewt.”
Platformî ard ziwan ke Îran de vera cinîyanê ke heq û azadîya xo wazenê, tepiştiş, îşkence û îdamî dewam kenê û cinîyê kurdan zî binê tedaya girane de yê, la xoverdayîşê înan dewam keno: “Ganî vengê cinîyanê hepisxaneyan û keyeyanê înan bêro eşnawitene; komelo mîyanneteweyî û dezgehê heqanê merdiman zî berpirsîyar ê ke vera nê binpaykerdişan tepşêko pêt bigîrê. No dem seba cinîyan û şarê kurdan hewceyê yewîyêka pête û rêxistinbîyaye ya; yewîya cinîyan ganî bingeyê hemparî, bawerî, hurmet û berpirsîyarîye ser o mabênê cinîyanê kurdan ê heme parçeyanê Kurdîstanî û dîyaspora de bêro ronayene. Ma bawer kenê ke qewetê cinîyanê kurdan yewîya înan de yo. Serrgêra şorişî de ma soz danê ke ma têkoşînê azadî û seypêyîye dewam kenê û beyreqa Jin, Jîyan, Azadî berz kenê.”
