Înîsîyatîfê Cinîyan ê “Hewcedarîya Mi bi Aştîye Esta” eşkerayîye da û waşt ke cinî zî mîyanê Komîsyonê Çimdarî yê Meclîsî de ca bigîrê û prosesî de cinî bibê kerdoxê sereke.
Înîsîyatîfê Cinîyan ê “Hewcedarîya Mi bi Aştîye Esta” derheqê qanûnê çarçewayî de, awanîya Yewîyeyê Mulkîyeyîyan ya qezaya Çankaya ya Anqara de eşkerayî daye. Endamê Înîsîyatîfê tewrê eşkerayîye bîyî. Eşkerayîye de pankartê ke ser o “Ma cinî hetgîrê aştîye û kerdoxê têkoşînî yê” nuştêni ame daleqnayene. Metnê eşkerayîye hetê endama înîsîyatîfî Nebahat Çalpane ra ame wendiş.
‘Ma wazenê Komîsyonê Çimdarî yê Meclîsî de ca bigîrê’
Nebahat Çalpan dîyar kerd ke ê wazenê bin banê Komîsyonê Çimdarî yê Meclîsî de ca bigîrê û wina vat: “Qebulkerdişê qanûnê çarçewayî yê Meclîsî seba qedênayîşê şerê gamêka muhîm bî. Sey înîsîyatîfê cinîyan verê nika zî ma dîyar kerdbi ke aştîye tena bêvengkerdişê çekan nêna awankerdene. Resayîşê aştîya komelkî, bi demokratîkkerdişê prosesî û wedaritişê sebebanê ke şerê çekdarî veto meydan, mumkun o. Ma nê qanûnê çarçewayî seba awankerdişê aştîye û demokratîkbîyayîşê komelî sey destpêke vînenê. Ma wazenê gamê demokratîk ke hîsê şaran yê aştîye ser o bihêz kenê, bêrê eştiş. Ma cinî wazenê ke Komîsyonê Çimdarî yê Meclîsî de, Heyetê Koordînasyonî û heyetê bîn ê bin banê nê koordînasyonî de bêrê awankerdene de, mekanîzmayê qeraran de ca bigîrê. Têgêrayîşê cinîyan ganî bi mekanîzmayanê xo ya muxatabê fermî bêrê vînayîş. No qanûn hetê hukmî û burokrasîyê ewleyî ra sey ‘destpêke nê, sey netîce’ yeno vînayîş. Ma na hişmendîye sey qerar û cezayan ke vera cinîyan vînenê. Çend roj verê vejîyayîşê nê qanûnî verfekê TJA’yî, Ayşe Gokkane 19 serre ra zêdeyêr ceza girewt.”
Nebahat Çalpan dewamîya eşkerayîye de waştişê înîsîyatîfî rêz kerd.
Waştişê înîsîyatîfî wina yê:
*Ganî nê caardişê ke goreyê ruhê prosesî nîyê biqedîyê.
*Ganî nê caardişê ke cinîyan ser o bi destê dewlete û mêrdeyan yenê kerdene biqedîyê.
*Ganî bêcezaverdişê mêrdeyanê bi unîformayan werte ra bêrê wedaritiş.
*Ganî faîlê cinîyan ke hetê dewlete û wezîfedaranê aye ra yenê pawitiş vejîyê meydan û bêrê cezakerdene.
*Ganî heyetê cinîyan ê heqîqate bêrê naskerdene û resayîşê belgeyanê laziman asan bibê.
*Ganî sîstemê qorîcî û bekçîyan ke seba cuya cinîyan raşeteraşt tehluke yê werte bêrê hewanayene.
*Ganî seba ke rayîrê sîyasetê demokratîk abo, caardişê qeyûmê biqedîyê.
*Ganî pêro girewteyê sîyasî bêrê veradayene.
*Ganî Qanûnê Têkoşînê bi Terorê rê (TMK) ke heqê xorêxistinkerdiş û xoîfadekerdişî rê astengîya tewr girdî bêrê wedaritiş.
*Ganî sere de heme girewteyê nêweş û heme girewteyê bîn ê sîyasî bêrê veradayene.
Eşkerayîye bi sloganê “Cinî cuye azadîye” û “Cinî aştîye de bi israr ê” qedîya.
