Fermandarê Pêroyî yê QSDyî Mazlûm Ebdîyî ard ziwan ke Qamişlo tarîxê herême û heme pabesteyanê ci temsîl kena û vat QSD entegrasyonê dezgehanê leşkerî û îdarî de vîyart merhaleya newî. Ebdîyî vat seba heqan do têkoşîn dewam bikero.
Serrgêra 100. ya ronayîşê Qamişloyî pîya bi hezaran kesan bi tewrbîyayîşê îdarkaranê QSD, Îdareyê Xoserî û Hukmatê Demkî yê Sûrîye ra heyetêkî Parka Azadî de ame pîrozkerdene. Program de muzîk, folklor, tîyatro û belgefîlmo ke qala tarîxê bajarî keno ca girewt.
Fermandarê Pêroyî yê QSDyî Mazlûm Ebdîyî ke şayî de qisey kerd, îfade kerd ke Qamişlo zaf kulturî û cuya hempare yê herême temsîl keno. Ebdîyî vat vera polîtîkayanê erebkerdişî yê wextê Baasî têkoşînê Îdareyê Xoserî dewam keno.
Ebdîyî vistvîrî ke herême demê peyênî de şahîdîya şerê giranî kerd û vat şarî vera nê hêrişan xo pawit û prosesê nê xoverdayîşî de QSD ame ronayene. Ebdîyî vat QSD netîceya xoverdayîşê şarî de ame ronayene, şervanê hêzanê kurdan ke vera hêrişanê serê herême şer kerd û şehîd bîyî yad kerdî û xoverdayîşê 15 serran ê şarî selam kerd.
Ebdîyî îfade kerd ke badê rijnayîşê rejîmê Baaasî newe ra înşakerdişê Sûrîye de ameyo merhlayêka newî û vat entegrasyonê dezgehanê leşkerî, asayîş û îdarî yê dezgehanê dewlete ame temamkerdene. Ebdîyî vat seba ke heqê kurdan û heme pabesteyan ê Sûrîye qanûnê bingeyî yê neweyî de bigêrê binê temînatî têkoşînê înan o sîyasî do dewam bikero.
