Wezîrê Xezîna yê DYA’yî Scott Bessent vat ke ê do vera Îranî “îzolasyonêko ke tarîx de nêameyo vînayîş” bi ca bîyarê û dîyar kerd ke do çîyêk ne bikewo lîmananê Îranî û ne zî tera vejîyo.
Mabenê DYA û Îranî de Peymanê Islamabadî ke ameybî îmazkerdene, do mudetê aye 17ê tebaxe de biqedîyo. Pêvînayîşê DYA û Îranî ke bi mabênkaran dewam kenê de, hetanî nika tu netîceyêk tera nêvejîyo, la hetê DYA’yî ra tehdîtê têdima yenê. Wezîrê Pawitişê yê DYA’yî, Pete Hegseth, wextê zîyaretê xo yê Panamayî de eşkera kerd ke DYA’yî wayîrê kapasîteyêka ke eşkena Îranî ser o dorpêçêko “bêmudet” bidomno.
Pete Hegsethî dîyar kerd ke keştiyê herêmê eşkenê bi dore bêrê wezîfedarkerdene û vat ke eşkenê estbîyayîşê leşkerî wextêko derg bidê dewamkerdene.
Derheqê babete de Wezîrê Xezîna yê DYA‘yî Scott Bessent zî eşkerayîyêke daye. Scott Bessent, vera Îranî hetê ekonomîye ra tehdît kerd û vat ke DYA do vera Îranî ambargoyê ke “tarîxî de nêameyê vînayîş” bi ca bîyaro. Scott Bessent, eşkerayîyêka ke Newsmaxî de daye de vat ke rayberîya Donald Trumpî do hewteyo ameyoxî de tedbîranê neweyan vera Îranî eşkera bikero û ê tedbîrî do derheqê îzolasyonê ekonomîyê welatî de bê.
Scott Bessent vat: “Hewteyo ameyoxî de paweyê eşkerayîyanê bînan bibê, çunke ma do tarîxê îzolasyonê ekonomîye yê welatê ke ser o ameyê caardene de do bibê ewilîn.”
