Şerê Amerîka-Îranî seke kewto qonaxêka xirab, Neqebê Hurmuzî sey babetêka sereke vejîyeno vernîya dayîşûgirewtişan.
Medyaya Erebî ewro derheqê şerê mabenê Washîngton û Tehranî û netîceyanê ey de nuşt. Na çarçewa de, rojnameya Îmaratî El Xalîc gotarêk bi sernuştê “Şerêko ke eşkeno hîra bibo” weşana, tede domnayîşê şerî û krîzanê mîyanneteweyîye û tehdîtê zêdebîyayîşê pêkewtişanê herême ver bi pêkewtişanê hîra de erjna.
Rojnameya El Quds El Erebî raverşîyayîşanê pêkewtişê Amerîka-Îranî de derheqê babeta Neqebê Hurmuzî de erjna û dîyar kerd ke şer êdî herra Îranî rê sînordar nîyo, rayîrê keştîdarî yê neqebî û enerjîye bîyê beşêk pêkewtişî.
Rojnameyî dîyar kerd ke trafîkê deryayî yê neqebî hema zî sînordar o, eksê eşkerayîyanê DYA’yî yê ke îdia kenê ke agêrenê asta normale. Rojnameyî şîrove kerd ke asaya yo ke Tehran qerardar o ke pêkewtişî xorîn bikero û no çî bi hîrakerdena hêrişanê Îranî ca û qerargehanê Amerîka û çend welatanê herême ser o girêdano.
Rojnameyî şerî sey ceribnayîşêk seba helwesta DYA’yî herême ser o erjna û dîyar kerd ke Îran, hewl dano ke xoverdayîşê xo bivurno kartê dayîşûgirewtişî û avantajêko sîyasî. Goreyê Rojnameyî, Îran, bi saya xoverdayîşê xo, “prestîjê Amerîka dinya xirab kerdo.”
Rojnameyê Independent Arabia nakokîyê ke mabenê rayberîya Serekê DYA’yî Donald Trump û rejîmê Îranî sey “şerêko nêtemam” name kerd, dîyar kerd ke her di hetî bê stratejîyêka zelal seba çareserî yan zî ancîyayîşî pêkewtişî domnenê.
Rojnameyî dîyar kerd ke her çiqas zextê ekonomîk û hêrişê hewayî yê Amerîka nêeşkayê rejîmê Tehranî birijnê zî, tehdîtê Pasdaranê Şorişî bi bandurîya xo ya Neqebê Hurmuzî ser o zî nêeşkayê Washîngton mecbûr bikerê ke agêro ferasetê xo yê verênî. Rojnameyî nuşt ke Îran seba rî bi rî bîyena zextî, bi hêzê wekîlanê xo îdeolojîya xoverdayîşî û “pawitişê averşîyayîşî” ya girêdayeyo. Eynî wextî de her di hetî zî bi problemê girewtena neqebî û nêeşkayîşê akerdena ey, bê hêzê leşkerî yan zî pêameyîşêko sîyasî rê rî bi rî yê.
