Navenda Çand û Hunera Arjenê ku li bin sêwana Şaredariya Bismilê xebatên xwe dimeşîne, di 17emîn salvegera wefata hunermendê mezin Aram Tîgran, wî bi bîr anî..
Li navçeya Bismilê ya Amedê, ji bo hunermendê mezin Aram Tîgran bernameyeke bîranînê hat organîzekirin. Çalakiya ku ji aliyê Navenda Çand û Hunera Arjenê ve hat lidarxistin, li Parka Vedat Aydin pêk hat û DEM Partî, hevşaredarên Bismilê û gelek welatî tevlî bûn. Li nava qadê pankarta ku tê de gotina Aram Tîgran a “Heke ez carekê din werim dinyayê ez ê hemû tank, tifink û çekan bihalînim û ji wan saz, cumbûş û zirne çêkim” hatibû nivîsandin hat vekirin.
Bername bi deqeyeke rêzgirtinê ji bo bîranîna cangoriyên di têkoşîna demokrasiyê de jiyana xwe ji dest dane dest pê kir. Piştî rêzgirtinê, sînevîzyona ku li ser jiyan û hunera Aram Tîgran hatibû amadekirin hat nîşandan.
Hevşaredarê Bismilê Guven Tanrikulu dibîranînê de axivî. Guven Tanrikulu di axaftina xwe de xeyalên Aram Tîgran ê li ser aştiyê vegot û wiha axivî: “Îro 17emîn salvegera wefata Aram Tîgran e. Em hêvî dikin ku xeyalên wî bi pevajoya Aştî û Civaka Demokratîk berdewam bikin. Ji bo ku em bikarin xeyalên Aram Tîgran pêk bînin hewceye em li malê bi zarokên xwe re bi Kurdî biaxivin. Kurdî nasnameya me ye.”
Di berdewamiya bernameyê de, xwendekarên ku li Navenda Çand û Hunera Arjenê perwerdeyê dibînin derketin ser dikê û gelek berhemên Aram Tîgran gotin.
Bîranîn bi gerandina govendê û gotina stranan bi dawî bû.
