Hemserekanê Pêroyî yê DEM Partî Tulay Hatîmogullari û Tuncer Bakirhanî ke pêşnîyazê qanûnê çarçewa îmza kerd, na merhale sey bertengê tarîxî name kerd û vat na îmzaya ameyoxê hemparî ya û seba paştdayîşî veng da.
Pêşnîyazê qanûnî yê bi nameyê “Qanûnê Xurtkerdişê Paştdayîşê Mîlî û Pêameyîşê Komelkî” ke di rojî verî dest pêkerd ke hetê wekîlan ra yeno îmzakerdene, hetê Hemserekanê Pêroyî yê DEM Partî Tulay Hatîmogullari û Tuncer Bakirhan û endamanê Heyetê Îmrali Pervîn Buldan, Mîthat Sancar û îdarekaranê partî û endamanê komsîyonî ra zî ame îmzakerdene.
Badê kombîyayîşê îmzayî Hemserekanê Pêroyî yê DEM Partî Tulay Hatîmogullari û Tuncer Bakirhanî kombîyayîşê çapemenîye kerd. Hemserekanê ke pêşnîyazê qanûnî îmza kerd, vat no serûberkerdiş seba çareserkerdişê meseleya kurdan bertengêko muhîm o.
Bakirhanî ard ziwan ke rixmê kêmayîyanê ci pêşnîyaz seba haştîye û ameyoxê hamparî gamêka muhîma ke ameye eştene û vat: “Ma do na gama verêne xutêr bikerê û bikerê komelkî.”
Hatîmogullari zî îfade kerd ke pêşnîyaz têna xora nêeşkeno problemî çareser bikero la eşkeno verê çareserîya demokratîke abikero û veng da heme partîyanê sîyasîyan ke wa paştî bidê qanûnî.
Endama Heyetê Îmrali Pervîn Buldan zî vat: “Wa haştîya ma bibo mendî. Wa îmzaya mi sey di îmzayan bêro qebulkerdene; a bîne bi nameyê Sirri Sureyya Onderî ya.”
