Hemserekê Pêroyî yê DEM Partî Tuncer Bakirhanî, Serekê Pêroyî yê Yenî Partî Ozgur Ozel reyde pêvînayîşî ra dima dîyar kerd ke ganî proses mîyanê muxalefet û desthilatî de nebo sebebê reqabetî û heme partî berpirsyarî bigîrê. Ozgur Ozelî zî bal ant raporê komîsyonê meclîsî ser o û vat ke heta nika xala 7ine ya demokratîkbîyayîşî nêameya caardene.
Hemserekê Pêroyî yê DEM Partî Tulay Hatîmogullari û Tuncer Bakirhanî, Merkezê Pêroyî yê Yenî Partî de bi Serekê Pêroyî yê Yenî Partî Ozgur Ozel reyde pêvînayîş kerd. Pêvînayîş de Prosesê Aştîye û Komelê Demokratîkî û rewşê rojeve ame nirxnayene.
Pêvînayîş ra dima çapemenî rê eşkerayîyêk ame dayene. Verê ra Hemserekê Pêroyî yê DEM Partî Tuncer Bakirhanî qisey kerd û vat ke ê serdanê sazî û sendîkayan kerdo û Yenî Partî reyde serdanê partîyanê sîyasîyan rê do dest pê bikerê.
Tuncer Bakirhanî dîyar kerd ke ê pêvînayîş de Prosesê Aştîye û Komelê Demokratîkî ser o qisey kerdo û wina vat: “Ma krîza ekonomîye û rewşê herêmî girewt dest û fikir û pêşnîyazê xo vatî. Qanûnê çarçewayî vîyart û ma ameyî merheleyêka newîye. Hêvîya heme kesan a ke qanûnê çarçewayî bikewo vîyartbarîye û sererastkerdişê qanûnî bêrê kerdene. Ma no mijar ser o zî qisey kerd. Seba ke no qanûn bêro ca, berpirsyarîyêka gird kewena ser sazî, sendîka û partîyê sîyasîyan. Ganî meclîs rol bigîro û Serekê Meclîsî birêz Numan Kurtulmuş ganî no derheqde cehd bikero. Ganî Meclîs de komîsyonêk biamêne viraştene, labelê hema nêameya viraştene. Ganî heme partîyê sîyasî zî no komîsyon de ca bigîrê. Ganî proses mîyanê muxalefet û desthilatî de nebo mesela reqabetî. Seba heme komelî û demokratîkbîyayîşê welatî yo. Ganî partîyê sîyasî zî no derheq de berpirsyarî bigîrê. No proses tena mîyanê 2 partîyan de nîyo. Yenî Partî prosesî de rolêka pozîtîf lîst. Seba nê zî ez sipas kena. Yenî Partî, tevî ke zextanê ver de vindî mend, piştîdayîşê xo dewam kerd.”
‘Eke ma behsê aştîyêk kenê, ganî zextanê muxalefetî ra fek ver bidê’
Tuncer Bakirhanî bal ant desthilatî ra muxalefet ser o zextan ser o û wina vat: “Zextanê înan ê vera ma her ca de helwêsta xo dîyar kerd. Eke ma behsê aştîyêk kenê, ganî zextanê ke muxalefet û çapemenî ser o est ê ra fek ver bidê. Tirkîya rê lazim o ke problemanê xo bi muzakere çareser bikero. Ma do vêşêr bi partîyê sîyasîyan û rêxistinanê komelî reyde bicivê û seba aştîye cehdkerdişê ma do girdêr bibê.”
‘Xala 7ine ya raporê komîsyonî hema nêameya caardene’
Ozgur Ozelî zî seba serdanî hemserekan rê sipas kerd û wina vat: “Demokrasî bi azadîya muxalefetî mumkun a. Desthilat seba ke muxalefetî bêveng bikero, heme hêza xo xebitneno. No de rolê muxalefetî ya ke tevî cîyawazîyan zî hemkarîya mîyanê xo zêde bikerê. Aştî seba menfeetê heme kesan a. Coka helwêsta ma ya roja yewine ya seba proses, nika zî teyîd kenê. Ma heme raporê komîsyonî îmza kerd. Raporî de xala 6ine bi qanûnê çarçewayî ame caardene. Labelê xala 7ine ya demokratîkbîyayîşî hema nêameya caardene. Sîyasetmedarî hema hepis de ê. Hema zî ser şaredarîyan qeyûm tayîn kenê. Tevî Dadgehê Huqûqê Merdimanê Ewropayî zî Osman Kavala nêyeno berdayene. Tevî qerarê Dadgehê Destûrî zî Tayfun Kahraman nêyeno berdayene. Hema zî rojnamegeran rê operasyon yeno kerdene. Heme muxalefetî ser o zextêko gird est o. Halk TV rê qeyûm ame tayînkerdene û yeno bêvengkerdene. Hetêk ra no nêeşkenê welat rayber bikerê û bi fonan welat kewto krîz, heto bîn ra raporê ke xo îmza kerdo nêcaardenê. Ma zî bi heme beşanê muxalefetî reyde bêrê pîya û pîya têbikoşê.”
Persanê rojnamegeran rê cewab dayî
Tuncer Bakirhanî konferansa Hewlêrî ser o persî rê vat ke zaf dînamîkê herêmî konferans de beşdar bîyî û konferans de proses ser o zî qisey ame kerdene, û vat ke gamanê pozîtîf yê Têgêrayîşê Azadîyî rê ganî dewlet zî game bierzo. Tuncer Bakirhanî dîyar kerd ke eke proses o ca de serkewte encam bigîro, Tirkîya do Rojhelatê Mîyanênî de xurt bibo.
Tuncer Bakirhanî fonan de dizdîye ser o zî vat ke ganî heme berpirsyarî bêrê cezakerdene.
Tuncer Bakirhanî, persa rojnamegeran a derheqê vatişanê Şêwirmendê Serekkomarî Mehmet Uçumî yê raydayîşê verê wextî ser o de dîyar kerd ke ê raydayîşê verê wextî ser o pêvînayîşî nêkerde û no rojevê înan de çin o.
Ozgur Ozelî zî no pers ser o dîyar kerd ke seba raydayîşê verê wextî rayê Îttîfaqa Komarî besî nêkeno û wina vat: “Seba ke raydayîşê verê wextî bibo, ra AKP û MHP teber 40 parlamenteran rayê pêwîst o. Birêz Hemserek vat ke ma rojdem de nîya. Sey Yenî Partî ma no ra vera yê. Eke wina yo, bila Mehmet Uçum vejîyo meydan û aşkera bikero ke ci ser o vano ma do raydayîşê verê wextî bikerê. 40 rayî do koti bîyarê?”
