YPJyî derheqê prosesê entegrasyon û dayîşûgirewtişanê hukmatê Şamî reyde eşkera kerd ke heta nika derheqê cagirewtişê YPJ’yî de qerarêkoê fermî û zelal çin o û da zanayene ke heta mîrasê înan binê ewleyîya qanûnî de nêro garantîkerdiş do têkoşînê înan dewam bikero.
Bingeyê peymana 29ê çeleyê 2026î serê de ke mabênê Hukmatê Şamî û Rayberîya vakur û Rojhelatê Sûrîye de amebi îmzakerdene, prosesê entegrasyon û dayîşûgirewtişê hetan dewam keno. Rixmo ke pêvînayîşê xeylê dezgehan ser o yeno kerdene zî, meseleya statu û ameyoxê YPJ’yî ser o mîyanê sîstemê neweyî de sey nuqtaya tewr muhîme manena. Serê qalkerdiş, pêşnîyaz û prosesê pêvînayîşan ê berpirsîyaranê Şamî reyde Verfekê Resnayîşî yê Yewîneyanê Pawitişê Cinîyan (YPJ) Rûken Cemal eşkerayîyêk vila kerd.
Eşkerayîya YPJ’yî wina ya:
“Çarçaweya peymana 29ê çeleyê 2026î de, sey Yewîneyanê Pawitişê Cînîyan (YPJ) dayîşûgirewtişê ma Şamî reyde dewam kenê. Ma aşma nîsane de Wezîrê Pawitişî Murhaf Ebû Qasra reyde pêvînayîş kerdbi. Sewbîna ma fikir û pêşnîyazê xo sey mektube pêşkêş kerdbî. Heta nika tu pêşnîyaz yan zî qerarêko fermî hetê berpirsîyaranê Şamî ra ma reyde nêameyo parekerdiş. Fikir est o ke YPJ sey hêzêka xoser a veraterorî mîyanê Wezaratê Zereyî de cayê bigêro, labelê heta na deqa ma nêresayê qerarêko zelal. Rojanê ameyoxan de seba qalkerdişê na mesela do pêvînayîşê ma berpirsîyaranê Şamî reyde bêrê kerdiş. Heta ke ma mîrasê YPJ’yî nêgîrê binê ewleyî û garantîyêka qanûnî do têkoşîn û xebatê ma dewam bikerê.”
