Endamê Komîteya Koçberanê Girê Spî Sebrî Mistefayî derheqê hêrişê vera koçberan de qisey kerd û dîyar kerd ke tayê hetî bi propagandaya reş wazenê prosesê peyserşîyayîşî bigîrê û mabênê kurdan û erebande şer vejê.
Komeka koçberanê Girê Spî, ke seba peyserşîyayîşê keyanê xo şîbî bajar, bîyî armancê hêrişan. Wexto ke koma koçberan resaye bajar, hêriş serê înan ame kerdene. Encamê hêrişî de hêrişkaran zîrar da erebeyanê koçberan û talan kerdî. Zêdeyê 100 keyeyê kurdan Îdareya Koçberîya Herêmî ya Girê Spî de ameyî dormeçarnayene. Seba pawitişê înan mudaxeleya lez û seba hêrişanê vera hemwelatîyanê kurdan, ke peyser şinê keyanê xo, tehqîqat ame waştene. Dima vengdayişê Hêzanê Emnîyetê Zereyî yê Herêma Kobanî zêdeyê 100 keyeyê kurdan, ke bi gedeyan û cinîyan ra Îdareya Koçberîya Girê Spî de dormeçarnaye bî, vetî û berdî cayêko emnîyetin.
Endamê Komîteya Koçberanê Girê Spî Sebrî Mistefayî derheqê nê hadîse û provokasyonî de ajansê ma rê qisey kerd.
‘Vera kurdan propaganda kenê’
Sebrî Mistefayî dîyar kerd ke ê sey Komîteya Girê Spî demêko derg o heq, hûmare û belgekerdişê mal û milkê koçberan ser o xebatan kenê û Hukmatê Şamî reyde têkilî de yê û vat: “Terba prosesê entegrasyonî zî tayê hetî nêwazenê no proses bêro ca. Tayê hetî her game de alozîyan vejenê û wazenê ke mabênê kurdan û ereban de şer bibo. Tayê kesî medya ya Sûrîye ser o hema zî ziwanêko nêrind xebitnenê, xeylî çîyan sûr kenê û no hema zî dewam keno. Ma xeylî kesê ke wazenê alozîye vejê tesbît kerdî û nameyê înan da hukmatî. Nê kesî taybetî medya de, komela erebî de, vera kurdan propagandaya reşe kenê ke koçberî peyser meşirê.”
‘Bangê xapnayoxî û hişyarîya komîteyî’
Sebrî Mistefayî bale ant ser vengdayîşê ke rojanê vîyartan de medya de ameyî kerdene û dîyar kerd ke nê vengdayîşî Îdareya Girê Spî ya Valîtîya Reqayê nameyî ra ameyî kerdene û vat: “Çend rojan ra ver tayê kesan medya de koçberan ra vatbî ke ‘Bêrê, mal û belgeyê xo bîyarê mudirîyetî, ê do malê şima bidê şima.’ Ma gelek rey şarê xo hişyar kerd ke bê agahîya komîteyî nê vatişan rê îtîbar mekerê û yew bi yew meşêrê, çike eke hadîse bibê ma nêeşkenê vernîye bigîrê. Labelê mixabin koçberê ma bê xebera ma şî uca û nê hêrişî vejîyayî meydan.”
‘Zêdeyê 100 keyeyan ameyî dormeçarnayene’
Sebrî Mistefayî ard ziwan ke wexto ke şar şî cayê îdareyî, erebeyê înan ser o hêriş ame kerdene û erebeyî ameyî veşnayene. Ey vat: “Dormeyê şarê ma bînaye de ame çarnayene. Dima emnîyetê Reqa û Kobanî mudaxele kerd. Dorpêç nêzdî 3 saetan dewam kerd û dima koçberî bi silametî vejîyayî û resayî Kobanî.”
‘Qampê dewleta tirke estê’
Sebrî Mistefayî peynîya qiseykerdişê xo de dîyar kerd ke Hukmatê Şamî rolê xo ca neyano û vat: “Hukmatê Şamî naye ra ver zî vera hadîsanê gelek qijanê Girê Spî rolê xo yê kayî nêkerd. Çira? Çike hema zî Girê Spî û dewanê ci de qampê dewleta tirke estê. Coka Hukmatê Şamî rolê xo neyano ca û destê hêzanê teberî nê hadîsan de est o. Ma sey Komîteya Girê Spî medya de mesajêko nuşteyî weşan kerd ke kesê ke nê hêriş de rolê est ê, bi lez bêrê cipersayene û ceza bêro dayene.”
