58emîn Mîhrîcana Çand û Hunerê ya Şaredariya Tetwanê ku bi dirûşma “Li Tetwanê çand heye, huner heye, em hene” tê lidarxistin di roja 3emîn di saetên êvarê de bi konserên rengîn berdewam kir. Di roja 3yemîn a mîhrîcanê de Delîl Dîlaner mohra xwe li şevê da.
58emîn Mîhrîcana Çand û Hunerê ya Şaredariya Tetwanê ku bi dirûşma “Li Tetwanê çand heye, huner heye, em hene” tê lidarxistin, di roja 3yemîn de brdewam kir. Îşev jî qada mîhrîcanê bi hezaran mirovî tije bû. Gel li ber stranên hunermendan kêfxweşiya mîhrîcanê heta derengê şevê jiya.
‘Divê qanûn bibin wesîleya azadiya Rêber Ocalan’
Destpêkê Parlementerê DEM Partiyê Huseyîn Olan axiftinek kir. Huseyîn Olan xêrhatina beşdaran kir û bal kişand ser pêvajoya Aştî û Civaka Demokratîk û got: “Wekî hûn dizanin di 27 Sibatê de Rêber Apo bangek kir û got gere em êdî bi siyaseta demokratîk û muzakereyê têkoşîna xwe bidomînin. Wekî hûn dizanin ev demeke ku amadekirina qanûnên demokratîk di rojevê de ye û dê hefteya pêşiya me pêşnûmeya qanûnê were rojeva meclisê. Em bendê ne ku destpêkê ev qanûn bibe wesîleya azadiya fîzîkî ya Rêber Abdûllah Ocalan û hemû girtiyên siyasî. Em dibêjin êdî bes e kuşitin û mirin, êdî bila gelê Kurd bedel nede.” Di dema axaftina Huseyîn Olan de gel, gelek caran dirûşma “Bijî Serok Apo” berz kir.
Piştî axaftina Huseyîn Olan Koma Payel ku li Amedê ji bo mîhrîcanê hatibû, bi tarza roka xwerû û muzîka akûstîk stranên xwe distirê derket ser dikê. Koma Peyal bi stranên xwe yên rengîn coş û peroşa gel derxist asta herî jor.
Silav ji Rêberê Gelê Kurd re şand
Piştî Koma Payel Hunermend Delîl Dîlaner derket ser dikê. Delîl Dîlanar, dema ku stranên xwe digotin beşdaran jî ew bi tenê nehêşt. Delîl Dîlanarê bal kêşand ser têkoşîna gelê Kurd û got: “Em bi hêsanî nehatin van rojan. Ev konser bi berdêlên mezin li vir pêk tên. Îro pêvajoyeke aşitiyê heye. Em silavên xwe ji Rêberê Gelê Kurd Abdullah Ocalan re ku ev pêvajo daye destpêkirin, dişînin. Pêwîst e her kes xwedî li vê pêvajoyê derkeve û em vê pêvajoyê bigehînin serkeftinê. Em dixwazin ku dewlet jî bi dilpakî rûne li ser masê.”
Hozan Hogir bibîranî
Delîl Dîlaner Hozan Hogir ku di Navenda Çandê ya Mezopotamyayê de bi hev re xebitîbûn jî bibîranî û strana ku li ser Hozan Hogir derxistibû ji beşdaran re strî. Delîl Dîlaner heta derengiya şevê bi stranên xwe yên dengbêjiyê him beşdar birin kûrahiya dîrokê him jî şeveke kêfxweş bi beşdaran da jiyîn.
Ji ber Komkujiya Şengalê sibê konser nîn in
Bi konsera Hunermend Delîl Dîlaner roja mîhrîcanê ya 3yemîn bi dawî bû. Sibê ji ber salvegera Komkujiya Şengalê konser tunene. Lê dê li avahiya Konservatûra Şaredariya Tetwanê panel werin li darxistin û di satên êvarê de jî li Yaşam AVMê fîlm were nîşandan.
