Programê Festîvala Kultur û Xoza ya Munzurî ya 24. ya ke mabênê 30ê temmuze û 2yê tebaxe de ya, dest pêkerd. Hunermendanê Dêrsimijî ra Kemal Kahraman, Dogan Çelîk û Erdogan Emîrî Festîvale ser o qisey kerd û vat: “Wa şarê ma na Festîvale de Kirmancîya xo rê, zon û îtîqatê xo ra wayîr vecîyo.”
Programê Festîvala Kultur û Xoza ya Munzurî ya 24. ya ke mabênê 30ê temmuze û 2yê tebaxe de amebî plankerdene, dest pêkerd. Seba naye sey her serre emser zî şarê Dêrsimî ameyo têlewe û xoza, kultur û îtîqatê xo rê wayîr vejîyeno. Hetî ra kilamanê xo vanê hetî ra zî paştî danê jûbinî ke Dêrsim bêwayîr nêmano. Hunermendanê Dêrsîmijî ra Kemal Kahraman, Dogan Çelîk û Erdogan Emîrî, seba Festîvala Munzurî ma rê qisey kerd.
‘Festîvale de ca bidime îtîqat, kultur û zonê xo’
Hunermend Kemal Kahraman Festîvala Kultur û Xoza de şenik cadayîşê ziwan, kultur û îtîqatî ser o vindeno û wina vano: “Hetî ra festîvale çîyêde rind o. Gerekê ma naye bikerîme. Hama namêyê Festîvale hetî tabîatî ra hetê îtîqatî ra hetê zon û zagonê seba Dêrsimî ra nameyê xo gêno, hama ez vajî festîvale nê hetî ra kemî manena, zaf qisey nêkenîme. Zafêrî hetê sîyasetî ra yeno qiseykerdene. Gerekê na festîvale çitur ke ameyo namekerdene goreyê aye raye ra şiro. Çike îtîqatê ma bibo, zonê ma û kulturê ma bibo pêro bindestîye der o. Gere ma seba nînan qisey bikerîme û problemê ma çik o, îtîqatê ma çik o, zon û zagonê xo ma çi fikirîyenîme, ma şikînîme çi bikime ser vindêrime. Festîvale de ca bidime nînan.”
‘Şarê ma qomê çeyî ra dûr mendo’
Dogan Çelîkî qiseykerdîşe xo de wina vat: “Şarê ma, seba Festîvale yeno welatê xo. No çîyêde rind o. 20 serrî yo ke qomê ma nê welatî ra durî nêmendo. Şarê ma zê zereyê çeyî bî. No wext festîvale jede vûrîyo. Zon û kulturî ra durî kewtene est a. Ma seba zon û kulturî ser xebetînîme, zaf cayan de nêjenenîme. Şarê ma bêro darênê xo, welatê xo, cîrananê xo bîvîno. Şarê ma îtîqatê xo ra durî mendo, Nika sey verî nîyo. No herd herdê ma yo, no welat ê ma yo. Pêrûne bêrê jîyaranê xo bîvînê û Kirmancîye ra durî mêvîndê. Wazenîme ke her cayî de zonê xo qisey bikerê.”
‘Wazenîme ke roye ma ûnca ke bêro ma ser’
Erdogan Emîr, seba festîvale ser o qisey keno û wina vano: “Na festîvale de qomê petûne yenê ju ca. Xeylê serrî yo ke weşate ma de tengiye bî. Ma wazenîme ke festîvale na tengîye wedara. Darê ma, wole ma, welatê ma destê ma de nêmend. Seba welatê ma qiseyê ma nîmendbi. Vatîme ke festîvale virazîm. Raye xo rakerîme, reçê xo rakerîme. Wazenîme ke royê ma, bêro ma ser. Festîvala ma bî keyfê ma. Qomê ma na festîvale de yeno welatê xo vîneno, sono dewa xo, sono mezelanê xo vîneno. Gegane kêmîye beno, ûnca ke rayê xo de wazenîme ke şêrîme.”
