Komeleya Şêx Seîd û Embazanê Ey, serrgêra şehadetê Şêx Seîdî û 46 embazanê ey a 101. de awanîya komele de eşkerayîya çapemenîye daye.
Serekê Komele Mehmet Kasim Firatî ewil qisey kerd û metnê eşkerayî zî hetê Endamê Rayberîye Bawer Firatî ra ame wendene. Metnê eşkerayî de amevatene ke têkoşînê Şêx Seîdî û embazanê ey ewro bîyo bingeyê waştişê heq, azadî û rûmetê şarê kurdî.
Serekê Komele Mehmet Kasim Firatî bala ant serê cuya Şêx Seîdî û rîpelanê tarîxî yê serra1925î û wina vat: “Na yewe xeylê feydeyê xo têkoşînê kurdan rê bi. Şêx Seîd Efendî, vera a qanûna serra 1925î ya ke estbîyayîş, ziwan û nasnameyê kurdan qedexe kerdêne, sere wedarna. Çunke înan vatêne ‘Ma kurd ê; cografya, welat, ziwan û aîdîyetê ma est ê.’ Înan vera sîstemê çinkerdişî sere wedarna û nê rayîrî de ganê xo feda kerd.”
‘Ma do bibê taqîbkerdoxê raşteqîn ê na dewa’
Dima ra metnê eşkerayî hetê Bawer Firatî ra ame wendene. Bawer Firatî dîyar kerd ke 29ê hezîrane tena roja vîrardişî nîya, roja newekerdîşê qewlê azadîye ya û vat: “Şêx Seîdî û embazê ey, wextêko tarî de, vera polîtîkayanê înkar û îmhakerdişî yê komare vengê xo yê azadîwaz berz kerd. Înan bi mal, milk û canê xo, binê şert û mercanê tewr giranan de, têkoşînêko bêhempa da. No mîras, ewro bîyo bingeyê têkoşînê heqanê merdiman, demokrasî û azadîya şarê ma.”
Eşkerayî bi nê vateyanê Şêx Seîdî qedîya: “Aşmîya cuya mi amey! Rayîrê şarê xo û bawerîya xo de fedakerdişê canî cayê poşmanîye nîyo. Peyê ma de mebermê û kêfê zaliman bi ma meyarê. Serewedaritişê ma hol fehm bikerê û azanê peyênan rê bi hawayêko raşt qal bikerê!”
