Seba ‘Mîtîngê Azadîye’ ke 27-28ê hezîrane de Amed, Wan, Mêrsîn û Stenbol de virazîyeno, Xarpêt, Amed û Çewlîg de broşurî ameyî vilakerdene û şar seba mîtîngî ame dawetkerdene.
Têgêrayîşê Cinîyanê Azadan (TJA), Partîya Herêmanê Demokratîkan (DBP) û Parlamenterê Partîya Têduştî û Demokrasî ya Şaran (DEM Partî), seba Azadîya Rayberê Şarê Kurdî Abdullah Ocalanî do 27-28ê hezîrane de Mêrsîn, Wan, Stenbol û Amed de mîtîng virazenê.
Seba mîtîngo ke do bi sloganê ‘Bi Raybertîya Azad Ver Bi Komelê Demokratîk’ saete 17:00î de Meydanê Îstasyonî yê Amedî de yeno viraştiş, xebatî dewam kenê.
Na çarçewa de, 17 qezeyanê Amedî de xebatî domyenê. Xebatê ke dewan û qezayan de yenê viraştiş de muhîmîya mîtîngî ame dîyarkerdene û vengdayîşê tewrbîyayîşî ame kerdene. Vera şan zî park û qehwexaneyî ameyê zîyaretkerdene û şar seba mîtîngî ame dawetkerdene.
Xarpêt
Rêxistinê DEM Partî ya Xarpêtî û Meclîsê Ciwanan seba ‘Mîtîngê Azadîye’ vengdayîşê tewrbîyayîşî kerd. Endamê PM’î ê DEM Partî Ugur Bayrak eşkerayîya ke vernîya bînaya partî de ame dayene, qisey kerd û wina vat: “Seba azadîya rayber û sermuzakerekerdoxê Prosesê Aştî û Komelê Demokratîk Abdullah Ocalan, ma do 28ê hezîrane de saete 17:00î de Amed de kom bibê. Ma zî Xarpêt, Çewlîg, Dêrsim ra sey tornê Şex Seîd û Seyîd Rizayî, hezaran reyde, ma do Amed de azadîya Abdullah Ocalan bîyarê ziwan. Govendê azadîye de ma do deyîranê azadîye vajê û ma pêro şarê xo dawet kenê.
Dima ra broşurî ameyê vilakerdene û şar seba mîtîngî ame dawetkerdene.
Çewlîg
TJA, DBP û DEM Partî Çewlîg bi rojano seba hedrekarîya mîtîngî kenê. Na çarçewa de merkezî de standî ameyê ronayene û dewa û qeza ameyê zîyaretkerdene û welatijî seba mîtîngê ameyê dawetkerdene.
