Heyetê Îmralîyî yê DEM Partî yo ke partîyanê sîyasîyan reyde muzakereyî vîraştî, pêşnîyazanê Rayberê Şarê Kurdî Abdullah Ocalanî zî pêşkêşî partîyanê sîyasîyan kerdî. Ame zanayene ke binê banê Wezaretê Edaletî de çarçewa qanûnêk amade kerdo.
Endamê Heyetê Îmralîyî yê DEM Partî ke parlamantera Wanî Pervîn Buldan û parlamenterê Rîhayî Mithat Sancar ra yenî pê, mîyanê hewteyî de partîyanê sîyasîyan reyde ameyî têhet û dima Serekê Meclîsî Numan Kurtulmuşî reyde kombîyayîşêk organîze kerd. Heyetî nê kombîyayîşî de eşkerayîyêka nuştekî daye û eşkera kerd ke kombîyayîşê înan çarçewaya qanûnî de bîyo û înan na babete ser o dayîşûgirewtişî kerdî.
Nê kombîyayîşî ser o, sey Ajansê Welatî (AW) ma tay çimeyanê DEM Partî ra tayê zanayîşî girewtî. Goreyê zanayîşanê ke kewtê destê ma, heyetê DEM Partî mîyanê hewteyî de îqtîdar, partîyanê muxalîfan û rayberanê dewlete reyde çarçewaya qanûnî ser o dayîşûgirewtişî kerdî. Sewbîna kombîyayîşê heyetî do mîyanê hewteyî de zî dewam bîkerî û babeta kombîyayîşan zî çarçewa qanûnî ya.
Sewbîna goreyê zanayîşanê ke çimeyan ma reyde pare kerdî, Rayberê Şarê Kurdî Abdullah Ocalanî zî bi rayîrê heyetî na babete de ganî çarçewa qanûnî senî biba, partîyanê sîyasîyan rê tayê pêşnîyarî kerdî. Ame musayene ke wezîfedarê huqûqî yê îqtîdarî, binê banê Wezaretê Edaletî de çarçewa qanûnêk amade kerda.
Ame vatene ke mîyanê hewteyî de kombîyayîşê heyetî do dewam bîkerî û yeno pawitene ke dima ke heyetî kombîyayîşê xo qedênayê, heyet do şêro Girawa Îmralîyî.
