Endamanê Meclîsê Dayîkanê Aştî ra Behîye Yalçin dîyar kerd ke heta ke azadîya fîzîkî ya Rayberê Şarê Kurdî Abdullah Ocalanî nêra ca, aştî zî awan nêbena. Sebîhe Bozan zî veng da dayîkanê eskeran ê ke şer de cuya xo ra bîyê û va: “Bêrê ma destê yewbînan bigîrî û pîya aştî awan bîkerî.”
Prosesê “Aştî û Komelê Demokratîk” ke pê vengdayîşê Rayberê Şarê Kurdî Abdullah Ocalanî 27ê sibata 2025î de dest pêkerd, hema zî rojevê sereke yê Vakurê Kurdîstan û Tirkiya yo. Komîsyonê Meclîsî yo ke çarçewaya prosesî de meclîs de ameye ronayene, rixmo ke zafêrî 4 aşî yo xebatê xo qedînayê zî, seba vîraştişê qanûnan hema zî plansazîyêka dîyarkerde çin a.
Endamê Meclîsê Dayîkanê Aştî Sebîhe Bozan û Behîye Yalçin ke bi serran o seba aştî têkoşîn danî, derheqê Prosesê Aştî û Komelê Demokratîk û hedîseyanê peyênan yê prosesî de qisey kerd.
‘Têgêrayîşê Azadîye yê Kurdîstanî pêro gamî eştî’
Dayîka Aştî Sebîhe Bozan dîyar kerd ke Têgêrayîşê Azadîye yê Kurdîstanî seba averşîyayîşê prosesî pêro gamê ke kewenê serê milê ci eştî û wina qisey kerd: “Şer çîyêko pirrê dej û derd o; dej, feqîrî, talankerdiş û xirabîye xo reyde ano. Pê vengdayîşê Birêz Bahçelîyî ma zaf heyecan kerd. Ma va belkî aştîyêka leze û xurt awan biba, labelê çi heyf ke no serr û nêm o ke dewlete seba aştî tu çîyêko şênber nêkerdo. Tena meclîs de komîsyonêk ame ronayene. Komîsyonî gureyê xo zaf hêdî rayra berd. Waştişê raya sîvîle ya demokratîk o bi ke komîsyon şêro zîyaretê Birêz Ocalanî. Komîsyon tewr peyên şi zîyaretê Birêz Ocalanî. Tesîrê Birêz Ocalanî hem PKK’yî ser o hem zî prosesî ser o est o. Eke vengdayîşê Birêz Ocalanî nêbîyêne, tu hêzî nêşênayênî PKK’yî rê çekan bido veradayîş. Rêxistine vengdayîşê Birêz Ocalanî reyde pêro gamê ke kewtêne serê milê ci eştî.”
‘Ganî şert û mercê rayberîye bêrê weşkerdene’
Sebîhe Bozan dîyar kerd ke rixmê gamanê ke hetê Têgêrayîşê Azadîye yê Kurdîstanî ra ameyî eştene zî, hetê dewlete ra proses hêdî yeno rayraberdene û wina dewam kerd: “Eke qanûnî nêrê viraştene, bi hezaran gerîlayî do senî tewrê sîyasêtê demokratîkî bibê? Eke gerîlayî bêrê û dima ra bêrê girewtene, ma ney teqez qebul nêkenî. Ganî girewteyê sîyasîyî zî bêrê veradayene. Bi seyan embazê ma zindanan de nêweş ê û emrê înan hepisxaneyan de vîyart. Sewbîna ganî şert û mercê Rayberîye bêrê zweşkerdene. Ganî Rayberîye mîyanê şert û mercanê azadan de prosesî rayra bero. Sey Dayîkanê Aştî, ganî ma bîşênî Rayberîye reyde pêvînayîş bîkerî. Ganî ê ke Ewropa de yê ê zî êdî bişênî agêrê welat.”
‘Ganî ma destê rayberîye xurt bikerî’
Dayîka Aştî Behîye Yalçin zî îfade kerd ke sey Dayîkanê Aştî, ê pê destpêkerdişê Prosesê Aştî û Komelê Demokratîkî zaf şa yê û wina qisey kerd: “Ma wazenî aştîyêka birûmete awan biba. Wa gonî nêrijîya û çekî nêrê şuxulnayene. Rayber bîşêno pêro merdiman reyde parekerdiş bikero û her kes daxilê nê prosesî bibo. Ganî endamê rêxistine ke çekê xo veşnayî, tewrê sîyasetê demokratîkî bibê û bawerîya şarî pê prosesî virazîya. Ganî ma zî seba aştî destê Rayberîye xurt bîkerî. Bawerîya ma bi Rayberê ma est a. Ma ameyî meclîsî de zî qisey kerd. Meclîsî de zî ma vat; gedeyê ma seba ziwan û estbîyayîşê xo têkoşîn danî. Ma teslîmbîyayîşî nê, aştîyêka birûmete wazenî. Seba naye zî ganî ziwanê çapemenîya înan zî bibedilîyo û pê ziwanêkê dişmenîye nê, pê ziwanêkî têgêrê ke prosesî paweno.”
‘Seba aştî destê xo bidî yewbînan’
Peynîya qiseykerdişê xo de Dayîka Aştî Behiye Yalçin îfade kerd ke heta ke azadîya fîzîkî ya Rayberê Şarê Kurdî Abdullah Ocalanî nêra ca, aştî zî nêbena û wina dewam kerd: “Rayberê Şarê Kurdî mîyanê çar dêsan de bibo, çareserî do senî biba? Aştî do senî bêra awan biba? Ma aştîyêka ke tede Rayberîye azad nîya nêwazenî. Ma aştîyêk wazenî ke tede Rayberê Şarê Kurdî azad bibo û mîyanê şarê xo de bibo. Sewbîna ganî pêro girewteyê ma bêrê veradayene. Dayîkê Kurdan her tim seba aştî têkoşîn danî. Ganî dayîkê tirkan ê ke gedeyê înan şer de cuya xo ra bîyê, ê zî destê xo bîdî ma û ma pîya aştî awan bîkerî. Ma nê deji pare bîkerî. Bi serran o ma kateyanê gedeyanê xo gêrenî, ma kateyanê gedeyanê xo nêvînenî. No 30 serrî yo mi kateyê kênaya xo nêdîyê, ez nêzana hela kênaya mi kamca de ya. Kateyê domananê ma êdî wa pê kargoyan nêrê. Ma wazenî aştîyêka birûmete awan biba.”
