Denîz Poyraz serrgêra qetilkerdişê xo ya 5. de mezela xo ser o ameye yadkerdiş. Yadkerdişî de maya ci Fehîme Poyraz qisey kerd û vat: “Wa êdî Tirkîya gamanê aştî bîerza. Seba ke gaman bierzî paweyê çi yê?”
Denîz Poyraz ya ke hêrişêkê nîjadperest ê vera awanîya Rêxistina Partîya Demokratîk a Şaran (HDP) ya Îzmîrî de ameybî qetilkerdene, serrgêra şehadetê xo ya 5. de Goristanê Buca Kaynaklarî de pê merasîmekê girseyî ameye yadkerdiş.
Yadkerdişî de zaf reyî sloganê “Şehîd namirin” ame vatene. Parlamenterê DEM Partî yê Îzmîrî Îbrahîm Akin, Dayîkê Aştî û zaf welatîyî tewrê programê yadkerdişî bîyî.
Yadkerdişî de maya Denîz Poyraz, Fehîme Poyraz û Parlamenterê DEM Partî yê Îzmîrî Îbrahîm Akinî qsey kerd.
‘Wa êdî gonî nêrijîya’
Maya Denîz Poyraz, Fehîme Poyraz waşt ke aştî pêroyê dinya de vila biba, Rayberê Şarê Kurdî Abdullah Ocalan azad bibo û wina vat: “Şehîde, şehîda ma pêrûnan a. Ma wazenî pêro girewteyî û girewteyê ke zindanan de yê serbest bêrê veradayene. Ganî ma pêro mil bîdî milê yewbînan û yewbînan verar bikerî. Ma wazenî dinya de cuyêka weşe, arame û pirrê aştî biba. Ma na dinya de aştî wazenî. Ma na yewe dewleta Tirkîya ra zî wazenî; wa destê xo yê aştî derg bikera, êdî gamanê aştî bierza. Seba gaman paweyê çi yê? Wa êdî gonînêrijîya.”
‘Masaya ci hema zî cayê xo de ya’
Parlamenter Îbrahîm Akinî zî bal ant dewaya Denîz Poyraze ser o, dîyar kerd ke ê do taqîbkerdişê dewa ra fek veranêdî û wina vat: “Tam 5 serrî verê cû nê saetan de, awanîya ma yê şaristanî de kiştişêk qewimîya. Kiştox ame muhakemekerdiş, eya, cezaya xo girewt labelê seba ma na dewa hema zî nêameya girewtiş. Ma pêro nê hêzan nas kenê ke hetkarîya ey kerda, ey organîze kerdo û verê ey dayo ucayî. No kiştox seba qetilkerdişê bi desan û bi seyan embazanê ma amebi plankerdene û ma dî ke no kar bi hêzanê derdûdorê xo reyde viraşt. Rîyê naye ra, ma tîya de reyna vanî ke şexsê Denîz Poyraz de ma do na dewa ra fek veranêdê û ma do heta peynî peyê ci de bibî. 5 serrî vîyartî, labelê sey vizêrî yo; ewro zî zereyê awanîya ma de masaya ci hema zî cayê xo de ya. Denîz Poyraz mîyanê ma de her wext gandar a. Ma aye xo vîr ra nêkerd, ma do xo vîr ra nêkerê.”
Merasîmê yadkerdişî vastişê sloganan reyde qedîya.
