Ajansê Mehr Newsî ya ke nêzdîyê dewleta Îranî ya, detayê mutabaqatê 14 nuqtayan ke mabenê Tehran û Washîngtonî yenê muzekkerekerdiş eşkera kerdî.
Ajansê Mehr Newsî ya ke nêzdîyê dewleta Îranî ya, detayê mutabaqatê 14nuqtayan ke mabenê Tehran û Washîngton de yenê munaqeşakerdiş, vila kerdî.
Goreyê mutabaqatî, nuqtaya tewr muhîme ganî adirbestêko domdar heme hetan de bêro caardiş. Ame eşkerakerdiş ke Lubnan zî do bikewo mîyanê adirbestî û antişê hêzê DYA yê derûdorê Îranî zî çarçewaya mutabaqatî de yê.
Neqebê Hurmuzî do newera bêro akerdiş
Metnê mutabaqatî de yeno dîyarkerdiş ke dorpêçê deryayî yê DYA ya Îranî ser o do bêro wedaritiş û Neqebê Hurmuzî ke binê kontrolê Îranî de yo mîyanê 30 rojan de newera trafîkê deryayî yê mîyanneteweyî rê bêro akerdiş.
Goreyê mutabaqatî, akerdişê Neqebê Hurmuzî ke beşêko muhîm ê bazirganîya enerjîya global o, eşkeno bazarê enerjî rehet bikero ke ke şerê ver amebi dereceyê vindertişî.
Wedaritişê ambargoyê petrolî û fonê 300 mîlyar dolarî
Goreyê eynê çimeyî, mutabaqatî de yeno eşkerakerdiş ke ambargoyê petrol û sektorê petrokîmya yê Îranî ser do bêrê wedaritiş.
Nînan reyde yeno plankerdiş ke bi fînansmanîya Dewletanê Yewbîyayeyan a Amerîka (DYA) û mutefîkê aye, 300 mîlyar dolar fon seba çareserkerdişê xesarê binawanîye û ekonomîyê şerî bêro xebitnayîş.
Muzakereyê nukleerî
Mutabaqat dîyar keno ke babeta programê nukleerî ya Îranî de seba pêkerdişêko peyên prosesêko newe yê dayîşûgirewtişî yê 60 rojan yeno dest pêkerdene.
Yeno plankerdene ke nê demî de zengînîya 24 mîlyar dolarî ya Îranî ya ke ameya cemidnayene bêra dayene û 12 mîlyar dolarê nê destpêkê pêvînayîşan ra ver seba Tehranî bêra pêşkêşkerdene.
Bedêlê ney de zî yeno vatene ke Îran do sozdarîya xo ya bi berpirsîyaranê Nuclear Non-Proliferation Treaty (NPT) rê reyna tekrar bikera.
Hema bi hewayêko fermî nêameyo qebulkerdene
Metnê pêşnimûneyî ke hetê Mehr Newsî ra ameyo weşanayene, seba pêkerdişê hetan çarçewayêk amade kerdbo zî heta nika ne Washîngtonî ne zî rayberîya Tehranî nê nuqtayî qebul nêkerdê ke behsê înan yeno kerdene.
