Platformê Sazgehanê Demokratîkan Parka Sumerî ya qezaya Yenîşehîrî yê Amedî de deklerasyonê “Mîtîngê Azadîye” ame eşkerakerdene. Eşkerakerdişê deklerasyonî de Hemsereka DBP’yî Çîgdem Kiliçgun Uçare, Hemserekê DEM Partî Tuncer Bakirhan û Aktîvîsta TJA’yî Çîmen Fîdane qisey kerd.
Bi pêşengîya Platformê Sazîyanê Demokratîkan, semedê azadîya fîzîkî ya Rayberê Şarê Kurdî Abdullah Ocalanî, 27ê hezirane de Wan û Mersîn de, 28ê hezirane de zî Amed û Îstenbol de “Mîtîngê Azadîye” do bêrê viraştene. Hemserekê Pêroyî yê DEM Partî Tuncer Bakirhan û Hemserekê Pêroyî yê DBP’yî Çîgdem Kiliçgun Uçar û Keskîn Bayindir zî tede; xeylê parlamenterî, hemşaredarî, endam û îdarekarê partîyanê sîyasîyan û sazgehê sivîlan, endamê platformî û welatijî tewrê nê eşkerakerdîşê deklarasyonî bîyî. Verê maseya ke deklarasyon tede ame eşkerakerdîş, pankarto ke ser de “Bi Rayberîya Azade Ver bi Civaka Demokratîke” nusîyabi, ame daliqnayîş. Peynîya mase de zî resmê Rayberê Şarê Kurd Abdullah Ocalanî amebî aleqnayene û tewrbîyayan posterê Abdullah Ocalanî berz kerdî.
‘Semedê Azadîya Rayber Apoyî ma do pêro waran pirr bikerê’
Aktîvîsta TJA’yî Çîmen Fîdane dîyar kerd ke wexto ke merdim tarîxê merdimayîye analîz keno, vîneno ke Kurdîstan zerrîya Rojhelatê Mîyanênî de cayêko zaf girîng de yo û wina vat: “La çi heyf ke Rojhelatê Mîyanênî de her tim şer, kiştiş û qirkerdişî est ê. Bi nê esasî, bi vengdayîşê Rayberê Şarê Kurd Abdullah Ocalanî, prosesê Haştî û komelê Demokratîkî ame dest pêkerdene û waştiş zî no yo ke nê şer û pêkewtişî bêrê vindarnayîş. No se serrî yo ke ziwan, nasname û estbîyayîşê şarê Kurd yeno înkarkerdîş. Cinîyan zî nê semedî ra, nasnameyê xo û şarê xo reyde mîyanê tekoşînî de cayê xo girewt. Felsefeyê Rayber Apoyî bi nê esasî raya ma roşn kerde. 27 serrî yo ke serê Rayber Apoyî de tecrîdêko giran est o û ma azadîya rayberê xo wazenê. Rayber Apoyî 27ê Sibate de prosesê ke newe da destpêkerdiş; cinîyan zî serê na babete de vate û paştîdayîşê xo mojna ke no proses ser bikewo. Ma vanê sey cinîyanê kurdan û şarê kurdî sebrê ma nêmend o; muzekkerevanê nê prosesî Rayber Apo yo û ganî xebata azadîya fîzîkî ya Rayber Apoyî pîl bîbo. Vengdayîşê ma seba şarê ma no yo: Semedê demokrasî, têduştî, azadî û aştîye ma do waranê mîtîngan pirr bikerê û ma sey cinîyanê kurdan do pêşengîya nê prosesî bikerê.”
‘Ganî ma aştîya xo pîya serê zemînêko demokratîk de awan bikerê’
Hemserekê DEM Partî Tuncer Bakirhanî va ke ê vînenî ke dewletê cîranî yê ke tede demokrasî kemî ya, mîyanê çireyêk û kaosêko giran de yê û wina vat: “Dewletê ke demokrasî nêgurenenê, heq, huqûq û nasnameya şaran, bawerîyan, cinîyan û ciwananê ke mîyanê sînoranê înan de cuyenî nas nêkenî, qet nêşênî pîya vindê. Ê yan bi şer û alozîyanê zerrî pêro enerjî û ekonomîya xo pûç kenî, yan zî seba operasyonanê hêzanê hegemonîk yê mîyaneteweyî û herêmî zemînî amade kenî. Rastîya xo de, her çi ke nê welatî yan zî welatê ke tede demokrasî kêm o ganî bikê, bi seyrêko eşkera û zelal verê çiman de yo. Modelê aştîye û Civaka Demokratîke yo ke Birêz Ocalanî 27ê Sibate de pêşkêş kerd, hem seba vejîyayîşê krîzê Rojhelatê Mîyanênî, hem zî seba vejîyayîşê şer û krîzanê ke dinya de dewam kenî, bîyo cewabêko zaf hol. Ewro her kes alozîya ke rojhelatê mîyanênî de est a ser vindeno. Eke ma nêwazenîme no kaosê Rojhelatê Mîyanênî bêro mîyanê welatê ma, her çi ke ma nêwazenî; ganî ma aştîya xo pîya serê zemînêko Demokratîk de saz bikê. No semed ra, no vengdayîş wayîrê mihumîyêka tarîxî yo. No seba Tirkîya hem fersendêko pîl o ke persanê xo yê demokratîkan çareser bikero, hem zî seba çareserkerdîşê demokratîk ê meseleya Kurdî yê 100 serrî, sînor û tewrêko zaf girîng o ke ame akerdîş û hina zî akerde yo.”
‘Muxatabê çareserkerdîşê persa Kurdan Birêz Ocalan o’
Bakirhanî wina dewam kerd: “Yanê 20 aşmîyo ke ma pawenî. Hêvîya çi de yê? Çira pawenî? Bawer bikê ke cewabê nê persî pêro kombîyayîşan de ke ma şînî ci, hetê karker, cinî, şar û bawerîyanê Tirkîya de, her tim ma ra zî yeno perskerdîş. Madem fersendêko wina tarîxî verê ma de esto, nê semedî ra ganî wextêko zaf kilm de seba haştîyêka mayînde û bi rûmet, çi lazimo bêro kerdiş. Ma çira kombîyî? Ma vanî: Muhatabê çareserkerdîşê persê Kurdan Birêz Ocalan o. Nê çîyî tenê ma nêvanî, tayê lîder û aktorê partîyanê îktîdar û muhalefetî zî nê çîyî vanî.”
‘Mesele persê demokrasî yo’
Hemsereka DBP’yî Çîgdem Kiliçgun Uçare destpêk de rojnameger Hafiz Akdemîr o ke 34 serrî verê cû amebî kiştiş, ard vîrî û wina qisey kerd: “Ey seba raya heqîqetî têkoşîyayî. Ma zî bi hurmet û bi heskerdîş Hafiz Akdemîrî anê xo vîrî. Bêro zanayîş ke bi mîlyonan embazê ey serê raya heqîqatî de xebitîyenî. Bawerîya ma nîyamê naskerdîş. Ziwanê ma nîyame naskerdîş. Şopa ma nîyamê naskerdîş. La belê ma wazenî ke ameyoxê welatê ma weş bibo. Ameyoxê Rojhelatê Mîyanênî weş bibo. Tena amayoxê ma nê ameyoxê heme şaran û bawerîyan weş bibo. Ma seba nê çîyî xebitîyenî. Bînê felsefeya Rayberîye de ma ver bi verî şonê. Sere de ma vanê wa na dewlete nameyê mesela rast bikero. Vanê mesele meseleya terorî ya? Mesele teror nîyo. Mesela persa Kurdan a. Mesela demokrasî ya. Mesela naskerdîşî ya. Mesela awa ke ma dima şerî ra haştîyêka hîna rinde awan bikê. Ma zanê ke hem azadîye hem kî aştîye karê de girana, barê de giran a. Seba her çîyê azadîye, her çîyê aştîye, her çîyê serekê xo ma vanê wa azadî bibo, aştî bibo. Ma seba naye vanê ke, dewlete vînena, aqilê dewletî vîneno, partîyê sîyasî vînenê. No welat de persêka zaf girane est a ke nameyê ci persa kurdan a. Waştena ma aya ke ma na mesela senî çareser bikerê, ganî ma no derheq de zaf gure bikerê.”
‘Statuyê şarê Kurdî girêdayeyê azadîya Rayber Ocalanî ya’
Çîgdem Kiliçgun Uçare dewamê qiseykerdîşê xo de ard ziwan ke tecrîd nêno wedaritîş û nêverdanê kes şoro Îmrali û Rayberê Şarê Kurdî reyde pêvinayîşan bikerê û wina vat: “Zindanê Îmralîyî nêverdano vengê Birêz Ocalanî berz bî bibo û vejîyo teber. La ma zanê ke şorişê Rojavayî de, zereyê şorişê Rojavayî de paradîgmaya Birêz Ocalanî est a, keda Birêz Ocalanî est a. Vakur de têkoşînê azadîye de, têkoşînê aştîye de Rayberîya Birêz Ocalanî est a. Başûr de yewbîyayîşê neteweyî de keda Birêz Ocalanî û rayberîya Birêz Ocalanî esta. Rojhelat de vera şerî tîfaqê hêzanê sîyasîyan de keda paradîgmaya Birêz Ocalanî est a. Tena Rojhelatê Mîyanênî de nê her ca de, tena mîyanê şarê Kurdî de ney, mîyanê pêro şaran de paradîgma cayê xo girewto. Keda Birêz Ocalanî hîna zelal o ke fikrê Birêz Ocalanî mîyanê pêro şaran de vila bîyo. Statuya şarê Kurdî girêdayeyê azadîya serekîya xo yo. Ma zî ewro pîya vanî wa serektî, Birêz Ocalan azad bibo; hem aştî, hem azadî, hem zî ameyoxê ma, pêro pîya bi destê xo ma do awan bikerê.”
Deklerasyon bi sloganê “Bijî Serok Apo” qedîya.
