Komîsyonê Ziwan, Kultur û Perwerdeyî ya KNK’yî bi eşkerayîyêka nuşteyî, seba kampanyaya ‘Wa Her Keye Bibo Dibistanêkê Ziwanê Kurdkî’ ya ke Vakurê Kurdîstanî de ameybî destpêkerdene, vengdayîşê paştîdayîşî kerd.
KomîsyonêZiwan, Kultur û Perwerdeyî ya Kongreya Neteweyî ya Kurdîstanî (KNK) derheqê kampanyaya ‘Wa Her Keye Bibo Dibistanêkê Ziwanê Kurdkî’ ya ke Vakurê Kurdîstanî de ameya destpêkerdene , eşkerayîyêk pare kerd û paştîdayîşê xo îfade kerd.
KNK’yî eşkerayî de bi keyfweşîyêka pîle kampanya firaz kerd û dîyar kerd ke ziwanê Kurdkî keye û estbîyayîşê nasnameyê şarê kurdî yo û wina vat: “Seba ma kurdan ziwan welatêk o ke ma pêro binê sîwanê xo de ano têhet û keno yew. O semed ra, zaf muhîm o ke ma pêro bi sereberzî keyeyanê xo bikerî mektebê ziwanê Kurdkî û asoyê ziwanî azanê ameyoxî roşn bikerî, cayê xo û estbîyayîşê mîletê xo xurt û garantî bikerî. Têkoşîn, xebat, plansazî, sîyasetê ziwan û kulturî, wezîfeyê mîllî û exlaqî yê her kurdêko ke wayîrê rûmetî yo.”
Eşkerayî de KNK’yî veng da pêro keyeyanê kurdan kerd ke tewrê kampanya bibî, keyeyanê xo bikerî mekteb û musnêrê ziwanê Kurdkî û waşt ke pêro dezgehê medya zî bi temamî beşdarê kampanya bibî û paştî bidî ci.
KNK’yî peynîya eşkerayî de nê vengdayîşî şarê kurdî rê kerd: “Ma veng danê şarê kurdî û Kurdîstanîyanê çar hetanê dinya û leteyanê bînan ê Kurdîstanî ke beşdarê na kampanya bibî û cehdanê hîrayan bidî ke ziwanê ma yê dayîke, qanûn û destûranê dewletanê Tirkîya, Sûrîye û Îranî de zî sey destûrê Îraqa federal bi fermî bêro naskerdene. Ganî heqê wendîş, nuştîş, îfade û aktîvîteyanê bi ziwanê Kurdkî pêro komel û sazgehan de seba kurdan bêro garantîkerdene û qezençkerdene.”
