Dimayê raporê Buroyê Sucan ê Neteweyî, dewaya Rojwelat Kizmaz di serran ra pey newera ameye akerdene. Goreyê raporî, têlefonê Rojwelat Kizmaz dimayê qetilkerdişê Gulistan Doku 46 rojî girewte mendo. No çî zî ano vîrê merdiman ke gelo ters û tehditê Rojwelat Kizmaz rê ameyê kerdene?
Rojwelat Kizmaz 9ê sibata 2024î de şaristanê Êlihî de bîye vîndî. Mergê aye bi guman bi. Cenazaya aye Awbendê ya Ilisuyî yê Êlihî de ame vînayene. Dewaya derheqê mergê bi guman ê Rojwelat de bi qerarê “bêbingeh o” hetê dozgerîye ra amebi girewtene. Aşma nîsane de, keyeyî bi delîlanê neweyan reyna muracatê Serdozgerîya Komarî ya Êlihî da. Keyeyî waşt ke qerarê verên ê dewaya Rojwelat bêrê betalkerdene, seba ke dewaya Gulîstan Doku de delîlê neweyî ameyî tespîtkerdene.
Detayê derheqê telefonî de
Goreyê xebera muxabira JinNewsî Şehrîban Aslan; her çend Rojwelat Kizmaz sey embaza tewr nêzdî ya Gulîstan Doku ameye zanayene zî, mergê aye yo bi guman xeylê persî xo reyde ardî. Îhtîmalêko bîn zî no yo ke Rojwelat şahîdîya vîndîbîyayîşê Gulîstan kerdo, her çî derheqê aye de zanayêne û seba ney bi hawayêko bi guman cuya xo ra bîya. Nimûneyêka şênber a na mesela cigêrayîşê Buroyê Sucan ê Neteweyî yê têlefonê Rojwelat Kizmaz de vejîya orte.
Raporî raştîye eşkera kerd
Goreyê raporê Buroyê Sucan ê Neteweyî 22yê nîsana 2025î de telefonê Rojwelat Kizmaz bilez dimayê vîndîbîyayîşê Gulîstan Doku ameyo girewtiş û 46 rojî dimayê ney, 20ê sibata 2020î de saete 4:04 DM de reyna ameyo akerdiş. Sewbîna, cigêrayîşê telefonê Rojwelat Kizmaz eşkera kerd ke qiseykerdişê aye yo peyên bi têlefonî 5ê adara 2024î de saet 2:47î de qewimîyayo.
Dosyeya Kizmaz neqlê Erziromî ameye kerdene
Dosyaya Gulîstan Doku ra beşêk şaristanê Erziromî de dewam keno, labelê ame dîyarkerdene ke dimayê cigêrayîşê telefonê aye, dosyaya Rojwelat Kizmaz zî neqlê Erziromî ameya kerdene.
