AMED – Qezaya Amedî Pîran de yew Mektebî de xebatkarê pakîye Bekir Akbaba wendekarêka gedeye 2 serrîye îstîsmar kerde. Na mesele ser o pîyê kêneke bal ant polîtîkayanê bêcezaverdayîşî yê dewlete ser o û vat: “Nê kesî wexto ke kênaya mi îstîsmar kerda, aye tehdît kerda û tira vato peyê mi de AKP est o, ti çewî ra çîyêk vaja ez to zî keyeyê to zî bikişî.”
Vakurê Kurdîstan û Tirkî de qetlîam û îstîmar vera cinîyan û gedeyan dewam keno. No problemê komelkî ser o dewlete hema zî polîtîkaya xo ya bêcezaverdayîşî domnena. Nê faîlî ke zerar danê cinî û gedeyan hetê dewlete ra yenê pawitiş. Nika zî Qezaya Amedî Pîran de yew Mektebî de xebatkarê pakîye Bekir Akbabayî wendekarêka gedeye 2 serrî îstîsmar kerde. 2 serrî ra pey kêneka ke îstîsmarî reyde rî bi rî menda, nê problemê xo 25ê nîsane de bi bermî û zor mekteb de mamostayê xo ra vana. Dima ra mamoste na mesela asayîşî ra vano û Bekir Akbaba 26ê nîsane de yeno girewtiş. Dima ra zî keyeyê kêneke 30ê nîsane de gerreyê Bekir Akbaba Baroyê Amedî rê keno.
Na mesela ser o pîyê kêneke ajansê ma rê (AW) qisey kerd. Pîyê kêneke bal ant polîtîkayanê bêcezaverdayîşî yê dewlete ser o û vat: “Nê kesî wexto ke kênaya mi îstîsmar kerda, aye tehdît kerda û tira vato peyê mi de AKP est o, ti çewî ra çîyêk vaja ez to zî keyeyê to zî kişena.”
Pê tehdît îstîsmar keno
Pîyê kêneke vano Bekir Akbaba mektebe de bi zorê çeke kênaya ey beno qatê bodrumî û wina dewam kerd: “Uca de kênaya mi îstîsmar keno û tira vano, ti nê çiyî yewî ra vaca, ez hem to kişena hem zî keyeyê to kişena. Peyê mi de AK Partî est o, ez înan ra bawer kena. Nika ra hewteyêk verê cû kênaya mi vat ez newazena şêra mekteb. Ma kerd nêkerd ma ra nêvat, vat ez şona mamoste ra vana. Mektep de mamosteyê xo ra vana, ‘no merdim bi zorê çekî mi îstîsmar kerd. 2 serrî tehdîtî reyde aye îstîsmar kerdo. Mamostayê kênaya mi qeydê vengî gêno û beno dano asayîşî. Yew roje ra pey Bekir Akbaba yeno girewtiş.”
‘Dewlete ma kurdan sey neyar vînena’
Pîyê kênayê bal ant kemasî û berpirsîyarîyanê dewlete ser o û vat: “Dewlete eger vernîya nê çîyan bigirewtêne, inê ke nê gureyan kenê cezayê pîlî bidayêne ci, no problem nêqewimîyayêne. Dewlete ma kurdan xo rê sey neyar vînena. O semedî ra zî wayîr nêvecîyena. Ey ra zî welatê ma de nê gureyî zaf benê. Ma zî vanê madem dewlet ma kurdan de yew proses kena, wa wayirê ma zî vejîya. Çira paştî nêdana ma? Nê kesî ke dewlete ra paştî genê wexto ke çîyêk kenê paştîya xo danê dewlete. Ma zî vera nê zîhnîyetî yê. Ma tekoşînê xo danê. No merdim Mîllî Egîtîm de xebitîyayêne, dewlete cigêrayîş û tehqîqat nêkena û gêna kar. Gedeyê ma senî şerî mekteb?”
‘Cezayanê en giranan bidê nê kesan’
Pîyê kêneke vano wexto ke kênaya ey beno qatê bodrumî kamerayanê mektebî de no asayêne û wina domna: “Mi Baroyê Amedî ra zî vat, wa hetkarîya ma bikêrî. Ma pêro gerek yew bibî ke ma bieşkê nê gureyan safî bikerê. Pê ma tena nêbeno. Ma wazenê cezaya en pîl bidê Bekir Akbaba. Dewlete nê kesan wexto ke gêna ma yew hewte dima ra ewnîyenê veredîyenê. Yanî berê vernî ra gênê peynî ra veradanê. Aye ra ma vanê nê polîtîkayanê xo ra fek veradê. Cezaynê en giranan bidê nê kesan ke wa reyna nê gureyan nêkerê. Ewro keyeyê mi veşa wa keyeyê yewna nêveşo. Ma ey ser têkoşîn danê.”
