TJA, DBP û DEM Partî bi munasebetê 1ê Gulane eşkerayîyêka nuştekî weşanaye û dîyar kerd ke heta rejîmê tecrîdî nêqedîyo, kedwerî zî nêqedîyeno û vengdayîş ame kerdene ke wa her kes beşdarê çalakîyan bibo.
Têgêrayîşê Cinîyanê Azadan (TJA), Partîya Herêman a Demokratîke (DBP) û Partîya Demokrasî û Têduştî ya Şaran (DEM Prtî) eşkerayîyanê xo de nê nuqteyan ser o vindertî:
TJA: Eşkerayîya bi sernameyê “Nika Wextê Cinîyan o” de ame vatene ke rejîmê tecrîdî yo ke Îmrali de ameyo ronayene, heme komelî kerdo mîyanê tarîtîyêk. TJA dîyar kerd ke astengkerdişê azadîya fîzîkî ya Abdullah Ocalanî, astengkerdişê aştîya komelkî û modelê cuyêka newa ya bi felsefeyê “Jin Jiyan Azadî” yo. Eşkerayî de wîna ame vatene: “Heta rejîmê tecrîdî nêwurzo, ma nêeşkenê destseronayîşê keda xo biqedêne. Her slogana ke ma 1ê Gulane de vanê, nîşaneyê qerardarîya ma ya vera tecrîdî ya.” TJA tewr peyên bale ant aqûbetê cinîyên ê sey Gulistan Doku û Rojîn Kabaîş ser o û vat ke ma do hesabê înan bipersê.
DBP: Eşkerayîya DBP’yî de ame dîyarkerdene ke butçeyê ke seba şerî ameyê vetiş, ekonomî herîmnayo û xizanî zêde kerda. DBP’yî wîna domna: “Yê ke qezenc kerd, tena baronê şerî bîyî. Butçeyê şerê 40 serran derbe daye yewîya karker û kedkaran. Serkewtîşê aştî û demokrasî, do bibo serkewtîşê karker û kedkaran. Ma bi ruhê Newroze qadanê 1ê Gulane de bibê yew.”
DEM Partî: DEM Partî zî Roja Kede, Yewîye, Têkoşîn û Piştgirîya Mîyanneteweyî pîroz kerd û vat: “Seba komelêko winasîn ke tede kedwerî û xespkerdişê heqan çin o, ma do têkoşînê xo bi firazî bidomnê. Ma do her tim hetê karker û kedkaran de bibê.”
