Qezaya Elbak a Wanî de hîrê welatîyî seba ke polîsê sîvîlî hişyar kerdê, ameyê destbendkerdene û bi hewayêko hovane înan rê îşkence ame kerdene. Pirnike û didanê ciwanêkî bi îşkence ameyê şiknayene.
Qezaya Elbak a Wanî de hîrê birayê bi nameyê Fatîh, Îsmaîl û Diyar Deger seba ke goreyê qeydayanê trafîkî tênêgêrayê, polîsê sîvîlî hişyar kerdê. Hişyarkerdişî ser o polîsan bi hewayêko veraqanûnî heme hîrê birayî destbend kerdê. Polîsan heme hîrê birayî bi îşkence destbend kerdê û dima ra berdê Mudirîyetê Polîsan ê Qeza.
Îşkence Mudirîyetê Polîsan de dewam kerd
Mudirîyetî de zî îşkenceya polîsan dewam kerd. Polîsan heme hîrê birayan rê îşkence kerd û pirnike û didanê yewî şikitê. Hîrê birayê ke dima ra ameyê veradayene hetê keyeyanê xo ra seba ke raporê derbî bigîrê, ê berdê nêweşxaneyê qeza. Raporê weşîye yê ke asta îşkenceyî mojnenê, ey ra pey keyeyê Degerî pare kerd ke ê do gerreyê polîsan bikerê.
