Mabenê Amerîka û Îranî de derheqê şerî de muzakereyê nerasterast dewam kenê û eşkerayîyê pênêameyîşî yê nê muzakereyan ser o yenê dayîş.
Mîyanê şert û mercanê sîyasî yê newe de, qiseyê ke Îranê ser o yê, vindertişê şerî û averşîyayîşê Lunbanî de rojanê peyînan de dewam kenê. Serekê Dewletanê Yewbîyayeyan ê Amerîka Donald Trump, eşkerayîyêk vila kerd. Eşkerayî de derheqê muzakereyan de detay nêdayê. Goreyê îfadekerdişê Trumpî, Îranî ser o “tay agahîyê başî” est ê.
Trumpî, teyaregehê Air Force One de rojnamegeran ra vat ke rewşa Rohjelatê Mîyanênî, bi taybetî ya Îranî, aseno ke ver bi başîyae şina. Trumpî dîyar kerd ke do demêko nêzdî de agahîyê zêdetir bêrê vilakerdene.
Eynî demî de, Trumpî hîşyarî daye ke eke heta çarşeme pêameyîşêko domdar seba qedênayişê şerî nêro qebulkerdene, beno ke şerê vera Îranî do dewam bikero. Trumpî vat ke dorpêçê serê lîmanê Îranî do bidomo û beno ke operasyonê leşkerî reyna dest pêbikerê.
Vindarnayîşê şerê Lubnanî û rolê Îranî
Heto bînî ra, peymana vindarnayişê şerê mabenê Îsraîl û Lubnanî de ke bi mabênkarîya Amerîka ameye viraştene, nîmeyê şewa 16ê nîsana 2026î de dest pêkerd. La goreyê raporan, tayî efserê hêzê Îsraîlî yê başûrî Lubnanî peymana fermî ya ke kewta pratîkî ser o nêameyê agahdarkerdene û ê bi raya medyaya teberî û medyaya dijital pê hesîyayê. Efseran ra yewî vat ke ‘no wext seba înan wextêko tewr tehluke yo û kontrolkerdişê leşkeran şertanê winasînan de asan nîyo.’
‘Ganî vindarnayîşê şerî bibo peymanêka domdare’
Serekê Lubnanî Joseph Aoun, qalkerdişê xo yê televîzyonî ser o de, dîyar kerd ke vindarnayişê şerî ganî bi peymanêka domdare bibo. Joseph Aounî, dîyar kerd ke Lubnan êdî “Ne qertê kayanê kesî yo û ne zî warê şerê kesî yo.”
Îranî bi cewabêko huşk îdiayê Trumpî red kerdê
Rayberanê Îranî ra îdiayê Amerîka bi hewayêko huşk ameyê redkerdene. Serekê Meclîsê Îranî ra Mohammad Bagher Ghalîba Trump bi vatişanê zuran sucdar kerd û vat ke Amerîka ne şer de serkewte bena ne zî dayîşûgirewtişan de serkewte bena. Ghalîbafî eşkerayîyêk de dîyar kerd ke Trump wextêko kilm de xeylî îdîayê “xeletî” kerdê û do no sîyaseto zureyîn tu netîceyê nêdo.
Îdîayê Trumpî yê ûranyûm û hetkarîye ser o
Eynî wextî de, Trumpî roportajêkî de medyayêka Amerîkayij reyde qisey kerd û vat: “Îranî qebul kerdo ke fînanskerdişê grûbanê sey Hamas û Hîzbulahî vindarneno û sewbîna do bi zengînîya ûranyûmê xo Amerîka reyde pîya kar bikero.” Goreyê îdîayanê Trumpî Îran “heme şertî qebul kerdê.” La nê vatişê Trumpî hetê Îranî ra bi hewayêko fermî ameyê redkerdene.
