Her çiqas şerê mabenê Amerîka û Îranî seba demêk vindertbo zî hêrişê vera Herêma Kurdîstanî dewam kenê. Dezgeyê Asayîşî yê Herêma Kurdîstanî dîyar kerd ke pê dronan hêrişê Silêmanî û Koye ameyo kerdene.
Hêrişê vera erdê başûrê Kurdîstanî bêmaben dewam kenê. Vizêrî şewe şaristanê Silêmanîye û Koye reyna bîyê hedefê dronan. Dezgeyê Asayîşî yê Herêma Kurdîstanî derheqê hêrişan de eşkerayîyêk vila kerd û bîlançoyê şewe eşkera kerd.
Dewa Zirgiwêzele bîya hedefe dronan
Goreyê eşkerayîya asayîşî, vizêrî şewe saete 22:00î de pê dronan hêrişê dewa Zirgiwêzele ya girêdayeyê şaristanê Silêmanîye ameyo kerdene. Eşkera bi ke badê hêrişo yewin, reyna pê dronan eynî dewe ameya bombebarankerdene. Na dewe sey tay grûbanê muxalîf ê Kurdanê Rojhelatî yena naskerdene.
Koye de 3 hêrişê têdima
Hêrişanê vera Silêmanîye reyde şaristanê Koye zî bîyo hedefê hêrişan. Asayîşî dîyar kerd ke vizêrî şewe mabenê saetanê 21:15 û 21:23î de pê 3 dronan hêrişê kampî bîyo ke qezaya Koye de yo. No kamp sey cayê koçberan û keyeyanê sîyasî yeno naskerdene.
Zerarê madî virazîya
Dezgehê Asayîşî eşkerayîya xo de dîyar kerd ke netîceyê nê hêrişanê vizêrî şewe de kesî cuya xo ra nêbîyo, tena zerarê madî resayo mal û milkê welatijan û cayê ameyê hedefgirewtene. Heta nika tu hetî bi hewayêko fermî berpirsîyarîya nê hêrişan nêgirewta xo ser, la nê hêrişî zaferî hetê artêşa Îranî ra çarçewaya “têkoşînê vera grûbanê muxalîfan” yenê kerdene.
