ÎHD’ya Şûbeya Îstanbulî ke derheqê hepisxaneyanê Herêma Marmarayî de raporê 3 aşmine de dîyar kerd ke hepisxaneyan de 1572 binpaykerdişî ameyî tespîtkerdene, Hepisxaneyê Îmraliyî de zî 144 binpêkerdişî ameyî tespîtkerdene.
Komeleya Heqanê Merdiman (ÎHD) Şûbeya Îstanbulî, hepisxaneyanê Herêma Marmarayî de binpêkerdişê ke aşmanê teşrîna verêne, teşrîna peyêne û kanûne de bîyê, bi kombîyayîşê çapemenîye ke komele de organîze kerd eşkera kerd. Sereka ÎHD’yî ya Şûbeya Îstanbulî Gulseren Yolerî û endamê Komîsyonê Hepisxaneyan Meral Nergîs Şahînî rapor eşkera kerd.
Goreyê raporê ke ame eşkerakerdene, 16 hepisxaneyan ra 48 muracatê binpaykerdişî ameyî kerdene ke 5 cinî, 43 camêrdî û 9 yê girewteyê edlî, 39 yê girewteyê sîyasî yê. Rapor de ameyo qeydkerdene ke muracatan û kontrolê çapemenîye ra 1572 binpaykerdişî ameyî tespîtkerdene. Binpaykerdişî ke ameyê kerdene wina yê; îşkence, darbkerdiş, muameleyo xirab, muameleyê bêhurmetî, binpaykerdişê heqê weşîye, heqê werdiş û şimitişî û binpaykerdişê resnayîşê awa pake, nêtemînkerdişê hewcedarîyanê pakîya şexsî.
‘Îmraliyî de 144 binpaykerdişî ameyî tespîtkerdene’
Rapor de ameyo dîyarkerdene ke Hepisxaneyê Tîpê F ê Ewlekarîya Berze yê Îmraliyî de ke Rayberê PKK’yî Abdullah Ocalan tede yo, derheqê qedexeya zîyaretî de 144 binpaykerdişî ameyî tespîtkerdene. Rapor de ameyo îfadekerdene ke hepisxaneyê tîpê S, Y û YGC de tecrîdê giranî zêde kenê.
Peynîya rapor de nê îfadeyî ca gênê: “Netîce de; tecrîdo ke hîna zaf vila beno û beno daîmî, problemê ke resayîşê tedawî û weşîye de benê, bêedaletîya înfazî, îşkence, muameleyê xirabî, qedexe û tetbîqê keyfî û reyna zafê problemî ke krîzê ekonomîkî û xizanîya girewteyan ardo meydan û girewteyî bi zor û şertanê angarya de kar kenê, înan rê çareserîyêka bi leze lazim a.”
