Raybera OHD’yî Gulbahar Ateş, destbendkerdiş û girewtişî ke bi manayê Newroze ameye kerdiş erjnayê û vat: “Krîmînalîzekerdişê kultur û nasnameyê kurdan vera ruhê aştî yo. Girewtişê merdiman ê bi manayê cil û berganê neteweyî, binpaykerdişê heqanê merdiman o.”
Şarê kurdî emser pîrozkerdişê Newrozî bi sloganê “Newroza Azadî û Yewîya Demokratîke” viraşt û bi hêvîyêka pîl a çareserîye pîroz kerd. Labelê rixmo ke qadî bi mîlyonan kesan reyde pirr bîyê û mesajê aştî ameyê dayene zî, dimayê pîrozkerdişan operasyonê destbendkerdiş û girewtiş dest pêkerdî. Sereştişê keyeyan de xeylê kesî ameyî girewtene. Endama Komela Hiqûqnasanê Seba Azadîye (OHD) ya Şubeyê Amedî, avûkat Gulbahar Ateş derheqê girewtişê ciwanan de ajansê ma rê qisey kerd û bal ant tesîrê nê operasyonan ê prosesê Aştî û Komelê Demokratîkî ser o.
‘Newroze nîşaneyê yewîya şarê kurdî ya’
Gulbahar Ateş bal ant menayê tarîxî yê Newroze ser o û vat: “Newroze bi se serran o sey yew roşano neteweyî pîroz beno. Kawayê Asinkar ra heta ewro, na roje sey nîşaneyê yewîya kurdan yena hesibnayene. Şarê Kurdî her serre bi ruhê azadîye wayîrê na roje vejîyeno. Ma serrêk ra zêdêr o ke mîyanê prosesê Aştî û Komelê Demokratîk de yê. Rêzdar Abdullah Ocalanî diyar kerdbi ke tewrbîyayîşê komarî wa bingehê nasname, azadîya fîkîr û kulturî ser o bo. Labelê çi heyf ke dimayê Newroze her ca de operasyon û hêrişî vera şarî ameyî kerdene. Dewlete goreyê ruhê aştî tênêgêrena û no helwêst nêyeno qebulkerdene.”
‘Amed de 22 kesî ameyî girewtiş’
Gulbahar Ateş derheqê bîlançoyê operasyonan de agahîyî dayî û qiseykerdişê xo wina domna: “Amed de nêzdîyê 30 kesî ameyî destbendkerdiş û 22 kesî zî ameyî girewtiş. Manayê girewtişî huqûqî nîyê. Sey nimûne; posterê rêzdar Abdullah Ocalanî kerd mana. Ma ney sey cezakerdişê komelî vînenê. Ocalan hetê şaran ra sey rayber yeno qebulkerdene û nêbeno ke resmê ey sey suc bêro pênasekerdene.”
‘Cil û bergî parçeyê nasname û kulturê şarê kurdî yê’
Gulbahar Ateş bal ant astengkerdişê renganê kesk, sûr û zerd û kincanê neteweyî ser o û wina va: “Welatîyê ke kincê Kurdkî dayê xo ra, bi manayê ‘kincê leşkerî’ nêverda ke bikewê qadan. Cil û bergî parçeyê nasname û kulturê şarê kurdî yê. Hêzê asayîşî qest kerd ke nê motîfanê kulturî krîmînalîze bikerê. No zî binpaykerdişê ‘heqê kombîyayîş û çalakîyanê aştîyane’ yo. Ganî derheqê nê polîsan de ke muameleyo xirab kerdê, cipersayîş bêro akerdene.”
‘Ganî îqtîdar gamanê pozitîf bierzo’
Gulbahar Ateş peynîya qiseykerdişê xo de dîyar kerd ke heta azadîya fîkîr û kulturî nêba, sîyasetêko demokratîk nêbeno û va: “Wexto ke merdim behsê aştî û demokrasî keno, berpirsîyarîyêka girane kewena milê merdimî. Rêzdar Ocalan gamanê tarîxî erzeno; nika dora îqtîdarî ya ke rolê xo bîyaro ca û gamanê pozitîf bierzo.”
