PJAK’i Newroza şarê kurdî û heme şaranê bindestan pîroz kerd û vat: “Ma nê roşanî sey ‘Roşanê Azadîye û Yewbîyayîşê Şarê Demokratîkî’ vînenê.”
Partîya Cuya Azade ya Kurdîstanî (PJAK) sebebê Newroze ke nêzdî bena eşkerayîyêko nuştekîye daye.
Eşkerayîya PJAK’î wina ya:
“Ma Newroza emserrî şertanê zehmet de pêşwazî kenê. Newroza emserrî do biba Newroza azadîya heme şaranê Îran û kurdî do pêşengîya têkoşînê azadîye û demokrasî bikerê. Ma bi nê îradeyê xurt prosesê vurîyayîş û şorişê gird ê Îranî de Newroze pêşwazî kenê. Na Newroze, Newroza ke qederê cuya azade ya kurdan û şaran dîyar kena. Na Newroze, prosesêk de ke heme şarê Îranî mîyanê şerêko global û herêmkî de yê, pîrozkerdişî ra vêşêr Newroza têkoşîne ya.
Şerê Îran, Amerîka û Îsraîlî zaf welatanê herême de vila bîyo û seserra vîyarte mîyan de heme hêzê ke şeranê Rojhelatê Mîyanênî de beşdar bîyê Kurdîstan kerdê warê şerî. Kurdîstanî warê şerî kerdêne şarê ma cuya azade ra mehrum verdaye. La ma pê naye zî heme Newrozan bi xeyalê pakan û azadîwazan pêşwazî kerdî. Şero ke nika yeno kerdene sîstemê îqtîdar û sermaye yê herême xorîn têşana. Nê prosesî de yeno waştene ke komelê ma zî têkoşîn bikero. Çunke rayîrê azadîye têkoşînî ra vîyareno.
Şarê ma yê Rojhelatê Kurdîstan û têgêrayîşê ma yê azadîye, no şoriş û vurîyayîşê tarîxî yê şaranê Îranî reyde caardiş rê amade yo. Eke şarî û miletê Îranî ewroyîne de nê vurîyayîşê girdî de mudaxele nêkerê, sîstemê îqtîdaran do reyde qederê ci dîyar bikerê û no firsend do bi temamî vîndî bibo. Coka rolê şaranê Îranî Newroza azadîya emserr tarîxî û dîyarker o.
Cinîyî ganî pêşengê şorişî bibê. Azadîya cinîyan, komelî û dormeyê Newroza emserrî bêemsal û tarîxî kena. Ma gama şorişêk de yê ke cinîyî aktoro eslî yo ke ameyoxê azadî dîyar keno.”
PJAK peynîye de heme miletan, keyeyanê şehîdan, Rayber Apoyî û hêzanê gerîlayan ê fedaîyan Newroze pîroz kerd û vat: “Yewbîyayîşê şarê kurdî û hêzanê ci yê sîyasîyan, şertê kewtişê warê têkoşîn û hîmo bingeyên yê xelisîyayîşê zincîranê zordayîşê ke bi seserran dewam keno yo. Felsefaya ma ‘Jin, Jîyan, Azadî’ ya û nê rayîrî de azadîya şarê kurdî, Rayber Apoyî, heme şaranê bindestan û cinîyan girêdayeyê yewbînan a. Warê Newroze yê nê serrî do bibê warê viraştişê îradeyê xelisîyayîşê mende yê zordayîş, asîmîlasyon, çinkerdiş, şer û rijnayîşî. Rayîrê azadîye ra agêrayîş çin o û Îran tu wext nêşêno agêro halê xo yê zordarî yê verênî.”
