Qezaya Depî ya warê Kawayê Hemdem Mazlum Doganî de adirê Newroze ame wekerdene.
Qadê Îstasyonî ya qezaya Depî ya Xarpêtî de bi sloganê “Newroza azadîye û demokrasî” Newroze ameye pîrozkerdene. Rayberî û temsîlkarê sazgehanê sîvîl û xeylê kesî bi kincanê xo yê neteweyîyan beşdar bîyî. Newroze bi rêzgirewtişî dest pêkerd û bi yew veng sloganê “Şehîd namirin” ame vatene.
Hemşaredar, endamê Komîteya Amadekar ê Newroze û hemserekê şaristan û qezayan qisey kerd û waşt ke Newroze biba wesîleyê “Yewîye” û “Azadîye”. Qiseykerdişan de vengdayîşê wayîrvejîyayîşê “Vengdayîşê Aştî û Komelê Demokratîkî” yê Rayberê Şarê Kurdî Abdullah Ocalanî ame kerdene.
Parlamenterê DEM Partî yê Rihayî Omer Ocalanî Newroza şarê kurdî û şaranê Kurdîstanî pîroz kerd û vat: “Ma her serre Newroza xo pîroz kenê û ameyoxê xo awan kenê. Newroze têkoşîn û xoverdayîşê vera Dehaqan a.”
‘Ganî ma seba aştî û çareserî têkoşîn bidê’
Ocalanî bale ante prosesê Aştî û Komelê Demokratîkî ser o û vat ke Abdullah Ocalan seba aştîyêka birûmete têkoşînêko xurt dano û vat: “Seba naye ganî ma destê Rayberî masa ser o xurt bikerê. Kurdî seba estbîyayîşê xo bedêlî dayê, bi pêşengîya Rayberî şarê kurd seba aştîye destê xo derg kerd. Nê welatî de nê semedî ra ganî ma seba aştî û çareserîye têkoşîn bidê.”
Ocalanî derheqê Rojhelatî de zî wina vat: “Zerrîya ma Rojhelat de ya. Uca de zordarîyêka girane est a. Şarê kurd ganî seba nasnameyê xo û têkoşînê xo yewîya xo bîyaro ca. Yewîya çar parçeyan ganî bêra viraştene. Wa bizanê ke ma domanê Kawayê Asinkar ê ma înkarî qebul nêkenê.”
Embaza kadroyanê pêşeng ê PKK’yî ra Zekî Yildizî, Emoş Yildiz û parlamenteran adirê Newroze wekerd. Newroze bi vatişê slogan, vatişê deyîran û girewtişê govende dewam kerd.
