Hemsereka DBP’yî Çîgdem Kiliçgun Uçar seba 8ê Adare Mîtîngê Rasteyê Îstasyonê Amedî de qisey kerd û vat: Nika ma Rojhilatê Mîyanênî de zereyê şerê dinya yê 3. derîme. No şer eslê xo de şerê qirkerdişê cinîyan o.
Hemsereka Partîya Herêman a Demokratîke (DBP) Çîgdem Kiliçgun Uçar seba 8ê Adare Roja Cinîyanê Dinya Mîtîngê Rasteyê Îstasyonê Amedî de qisey kerd û vat: Nika ma Rojhilatê Mîyanênî de zereyê şerê dinya yê 3. derîme. No şer eslê xo de şerê qirkerdişê cinîyan o.
Çîgdem Kiliçgun Uçare verî cinîyê ke ameyê rasteyê Îstasyonî û cinîyê dinya silam kerdî û seba roja cinîyan wina va: “Ma bi xêr cînîyê xoser, ma bi xêr cinîyê azad, şima pêro pîya xêr amê, sere û çimanê ma ser amê. Bi zerê û heskerdiş silam û hurmet ruşnena şimarê. Xwezîba ma ke ma ewro serê dinya de her ca de, her raste de ebe reng û vengê xo ça gênîme xo nîşan danîme û seba azadîya cinî û seba amayoxa azadîya cinî.
Roja ma roja 8ê Adare yê Cinîyanê Dinya bimbarek bo, Pîroz bo, Fîraz bo. Duştê ma de jû pergalê serdestîye est o. Pergal yan zî bandorê camêrdîye est o. Zerê polîtîkaya xo de çi est o? Dişmenîya vera cinîye est o. Çi est o? Zerê na polîtîka de girewtene, hepiskerdene est o. Xizanî est o. Kiştena cinîyan est o.
Ma kî vanî me ke hemberê naye de paradîgmaya ma ya ekolojîke, demokratîke û azadîya cinîyan de çi est o? Ameyoxê ma est o. Têduştîye est a. Cuya azadîye, cuya têduştîye est a. Şima kî zanenê zereyê jû serre de nê welatî de 400 cinî ameyî kiştene. Kamî kiştî? Xeberan de vînenîme; yan pî kişeno, yan mêrdê xo yo, yan waştîyê xo yo. Xebere de vanê ke cinîye şeveknayîş waşt, dewlete nêşeveknê û cinîye amê kiştene. Zereyê jû aşma 2026î de 23 cinî ameyî kiştene.
Nîka ma kî pêrodayîşê xo kenîme, xoverdayîşê xo berz bikerime, ebe çi kenîme? Ebe mezgê xo kenîme. Mezgê ma de çi est o? Ana Zarîfe ra heta Sara, heta Denîz Çiya pêrodayîşê ma de, xoverdayîşê ma de cuya xo ramenê. Xwezîba ma ke sereyê ma de, mezgê ma û zerê ma de mîrasêko girs est o. Mîrasê cinîbiyayene est o.”
‘Tarî şima rê bo, roştî û azadîye ma gênîme’
Hemsereka DBP’yî şerê dinya yê 3. yo ke Rojhilatê Mîyanênî de kur bîyo ser zî vinerte û wina vat: “Nika ma Rojhilatê Mîyanênî de zereyê şerê dinya yê 3. derîme. No şer eslê xo de şerê qirkerdişê cinîyan o. Rojava de ebe destê ÎŞÎD’î, ebe destê camerdîye vat ke ‘ma nêverdanîme cinî azad bibê.’ Kezîyê Denîz Çîya ye birnayî û televîzyonan de nîşanê ma da. Vat ke ‘Ma vernîya azadîya şima de vindenîme.’ A demî sebî pêroyê dinya de xoverdayenê de pîle virazîye. Pêro pîyayê dinya de cînîyan gilangê xo, kezîyê xo munîtî û va ‘ma raye nêdanîme tarîtîya ÎŞÎD’î.’ Cinîyan vat ke ‘tarî şima rê bo, roştî û azadîye ma gênîme, yê ma ya.’ Vat ke ‘tarî şima rê bo, ma ebe pêrodeyîşê xo, ebe xoverdayîşê xo teynîya Rojava de nê, serê dinya de her ca de roştî danîme.’
‘Pîyabîyayîşê ma, xoverdayîşê ma daîm bo’
Azadîya cinîye û azadîya şarî yê komelî girêdayîyê jubinîyê. Ma nêeşkenîme jubinî ra cîya bikim. Pêroyê dinya qaytê Rojavayî keno. Azadîya cinîye, ameyoxa cinîye ya bi destê camêrdan bîyêne yan kî bi destê xo bîyêne. Ucade henî bî, Vakur de henî bî ewro kî Rojhilat binê şerî de ro. Wexto ke ma qalê Rojhelatê Kurdîstanî kenîme Şîrîn Elemhulîya ke xoverdayîşê xo ca nêverda yena ma vîrî. Rojhilat ke ame vatene kame yena ma vîrî? Jina Mahsa Amînî yena ma vîrî. Se bî ucade? Xoverdayîşê serê nameyê Jin Jîyan Azadî pêroyê dinya ra bî vila. Ame vatene û ame waştene. Ma kî vanîme ke eke cuya ma esta ganî cuyêka azade bo. Cuyêka têduştîye bo. Wazenîme ke cuyêka pêro pîya bo. Na hîsî ra şima rê silam û hurmetê xo ruşnena. Pîyabîyayîşê ma, xoverdayîşê ma daîm bo. Raya ma akerde bo.”
