Hunermend Elî Mensûr di 60 saliya xwe de ji ber nexweşiyê koça dawî kir.
Hunermend Elî Mensûr ê ji bajarê Amûdê îro di temenê xwe yê 60 saliyê ji ber nexweşiyekê ku demeke dirêj bû pê ketibû, jiyana xwe ji dest da.
Elî Mensûr di temenekî biçûk de dest bi rêwîtiya hunerê kiribû. Li bajarên Qamişlo, Hesekê û Amûdê bi stranên xwe beşdarî pîrozbahiyên Newrozê dibû.
Hunermend Elî Mensûr di sala 1982yan de, tevî hejmareke hunermendên din Koma Mehabad ava kir. Hunermend Elî Mensûr jî di nava komê de gotinên gelek stranan nivîsandin û saz kirin.
Di sala 1986an de Elî Mensûr tevî hejmareke hevalên xwe Koma Agirî li bajarê Amûdê ava kir. Stranên ku nivîsandine û saz kirine li ser asta Kurdistanê deng veda.
Hunermend Elî Mensûr bi welatparêziya xwe û girêdana xwe bi civak û doza Kurd ve dihat naskirin. Ji ber straneke xwe ya neteweyî ji aliyê rejîma Baasê ve hat girtin. Tevî zextên rejîmê jî dest ji hunera xwe ya şoreşê berneda.
Cenazeyê hunermend Elî Mensûr dê li bajarê Amûdê bê veşartin.
