Cîgirê Serokwezîrê Hikûmeta Demborî ya Herêma Kurdistanê Qubad Talebanî xwest krîzên Herêma Kurdistanê bi dawî bibin û wiha got: “Tiştê ku li Parlamentoya Kurdistanê rû da cihê şermê bû, lê ev ne dawiya her tiştî ye; ev krîz dikarin werin çareserkirin û divê dawî li wan were.”
Cîgirê Serokwezîrê Hikûmeta Demborî ya Herêma Kurdistanê Qubat Talebanî di Korbenda Stratejîk a Silêmaniyê ku ev du roj in bi tevlibûna serkirde û kesayetên siyasî, dîplomat, aborî û leşkerî yên Iraq û cîhanê didome de, li ser krîza di navbera PDK-YNKê de axivî û bal kişand ser sedem û çareserkirina krîzê.
Têkildarî rewşa Herêma Kurdistanê Qubad Talebanî ev tişt anî ziman: “Tiştê ku li parlamentoyê rû da cihê şermê bû û li tu welatekî demokratîk ê cîhanê tiştekî wiha çênebûye. Lê belê ev krîza niha ya Herêma Kurdistanê ne tiştekî wisa ye ku çareser nebe û divê dawî lê were.”
Qubad Talebanî balkişand ser nakokiyên di navbera PDK-YNKê de û wiha got: “Her çendî li Waşîngtonê peymana stratejîk hate îmzekirin û ji wê demê ve karê hevbeş hate kirin jî lê nakokî ji bingeh ve nehatin çareserkirin. Ji ber vê yekê nakokî heta îro bi vî rengî hatin; karê hevbeş jî li ser asta kesan bûye, ne li ser asta saziyan.”
Li gorî Qubad Talebanî, yek ji pirsgirêkên wan ên bi PDKê re û di nava hikûmetê de ew e ku desthilat di destê çend kesan de hatiye komkirin û ji bo herêmên din nehatiye dabeşkirin.
