Wan de dikandarê ke cilûbelgê kurdî virazenê, dîyar kerd ke çike ê qumaşî bi dolar gênê, qumaş biha yo û vat: “Cayê ke ma qumaşê xo cilûbelgê kurdî rê Dûbaî, Çîn û Hîndistan ra bwazê, ma bi xo bivirazê, kara ma do vêşî bibo.”
Kurdîstan de kulturê cilûbelgan, ke serranê peyênan de eleqeyêko zaf ci rê esto, bîyo sektorêko bazirganî. Bi zafêrî Wan, Colemêrg û Şirnexî de, ke bi dawetanê xo namdar ê, dirûtiş û viraştişê cilûbelgê kurdî zaf o. Hemwelatî zî cilûbelgê kurdî rê eleqeya zaf mojnenê û rojanê taybetan de xo ser kenê.
Dikandaran, ke cilûbelgê kurdî derzenê û roşenê, derheqê viraştiş û vayîya binfîstan û fîstanan de qisey kerd.
‘Krîzê ekonomîye ma ser o tesîr kena’
Dikandar Okan Reşîtogluyî dîyar kerd ke ey no dikan keyeyê xo ra girewto û 3 serrî yo ke dikan de o. Okan Reşîtogluyî vat ke ê qumaşê xo Dûbaî ra gênê û hema o ca de zî danê viraştene. Okan Reşîtogluyî vat ke ey binfîstan û fîstanan Dûbaî de danê viraştene û ebi kargo înan rê yenê û wina vat: “Tirkîya de krîzêka ekonomîye zî esta, coka ma nêeşkenê zaf kar bierzê ser. Serra par ma fîstanêk bi 4 hezar lîreyî rotêne, ewro ma bi 4 hezar û 200 lîreyî roşenê. Coka rotişê binfîstan û fîstanan zehmet o.”
‘Vaya ci bi qalîteyê qumaşî vurîyeno’
Dikandar Sedat Savci yo ke hem deştiş keno hem cilûbelgan roşeno, dîyar kerd ke pîyê ey 40 serrî no kar kerdo û 20 serrî yo ke ey no kar pîyê xo ra girewto û dewam keno. Sedat Savciyî vat ke ê qumaşê xo Dûbaî, Çîn, Kore û Iraq ra gênê û vat: “Eke dawetî zaf bibê, viraştişê binfîstan û fîstanan 10-20 roje ramenê. Qumaşê binfîstan û fîstanan heme 3 metre ê û bi qalîteyê qumaşî 500 lîreyî ra heta 15 hezar lîreyî vurîyeno. Çike ma qumaşê xo bi dolar herînenê, serra par ra vêşî çî nêvurîyaya.”
‘Kara ma nika kêmî bîya’
Dikandar Kemal Yalçin hem karê deştişî hem zî rotişî keno. Kemal Yalçinî bale ante sektorê cilûbelgî ser û wina vat: “Nêzdîyê 22 serrî yo ke ma nê karî kenê. Verê kar zaf bî, labelê nika zaf kêmî bîyo. Çike ma qumaş bi dolar gênê, neçar menanê ke vaya cilûbelgî bierzê ser. Heto bîn ra kire, ceyran û xebatkarê ma estê û ganî ma pereyê înan zî bidê. Vaya ma bi qalîteyê qumaşî vurîyenê. Rotişê binfîstan û fîstanan verê ra zaf zehmet o. Ardîş û vîyartişê qumaşan gumruk ra zaf zehmet bîyo û ma heme qumaşan rê fatûre gênê. Ma binfîstan û fîstanan hem derzenê hem zî roşenê. Karê ma sey serrê vîyartey o.”
‘Heta qumaş yeno destê ma, vayîya ey zêde beno’
Dikandar Akîf Yîgît o ke binfîstan û fîstanan roşeno, dîyar kerd ke qumaşê ke ê gênê heme bacî rê girêdayî ê û vat: “Heta ke qumaşê ma yenê destê ma, vayîya înan vurîyeno. Çike kare kemîya, terba zêdebîyayîşê dolarî zî ma serra parî ra vêşî kar nêanto ser. Cayê ke ma qumaşê xo cilûbelgê kurdî rê Dûbaî, Çîn û Hîndistan ra biwazê, ma xo bivirazê, kara ma do vêşî bibo.”
