Îdarekarê TUHAY-DER’î yê Wanî Nedîm Şîpalî bale ante rewşa xirabe ya hepisxaneyan ser o û vat: “Madem ke prosesêkê aştî dest pêkerdo, ganî gamê zerrî ra bêrê eştene û hepsîyê nêweşî lezabez bêrê verdayene.”
Qanûnê Çarçewayî 10ê tebaxe 2026î de Meclîsê Tirkîya de ame qebulkerdene û 18ê tebaxe de Rojnameyê Fermî de ame weşanayene. Goreyê qanûnî badê qebulkerdişê Heyetê Emnîyetê Neteweyî (MGK) nêzdîyê 4 hezar hepsîyê ke bi PKK’yî reyde eleqedar ê, do bêrê verdayene. Serekê MHP’yî Devlet Bahçelî 6ê teşrîna verêne de vatbî ke bicaardişê qanûnî babeta tewr muhîme ya vernîya înan a la heta nika tu averşîyayîş nêbîyo.
“Pawitişê ma verdayîşê hepsîyan o”
Şîpalî ard vîrî ke destpêkê Prosesê Aştî û Komelê Demokratîkî ra nat rewşa hepisxaneyan de tu bedilîyayîş nêbîyo û vat: “Badê gama 27ê sibate Qanûnê Çarçewayî vejîya. Gamêka qije bîye la ma reyna bihêvî bîyî; ma vatêne bi taybetî hepsîyê nêweşî do bêrê verdayene. Eştişê gaman girê dayo MGK’yî; eke MGK qebul nêkero, embazê ma nêyenê verdayene. Kurdan berpirsîyarîya xo arda ca la dewlete çîyo ke milê aye ser o yo, nêkerdo. Mabênê prosesê aştî û MGK’yî de tu têkilî çin a.”
“Ganî hepsîyê nêweşî lez bêrê verdayene”
Şîpalî behsê rewşa hepsîyanê nêweşan ê Hepisxaneyê Wanî kerd: “Tuncer Saglam înan ra yew o; nêweşîya ey merheleya çarine de ya, çend rojî yo ke seba dermankerdişî berdo Ankara. Ma zaf muracatî kerdî la nêameyî qebulkerdene. Embazê ma êdî nêeşkeno awe zî bişimo. 11 embazê ma yê nêweşîya girane Hepisxaneyê Wanî de est ê; ma rewşa înan roj bi roje parlamenter û avûkatan rê şawenê la hema zî tu rayîr nêameyo dîyarkerdene.”
“Heyetê çimdarîye goreyê keyfê xo qerar dano”
Şîpalî vat ke hepisxaneyan de nêweşî nêyenê dermankerdene, bi kelepçe yenê muayenekerdene û sirgunî dewam kenê: “Embazê ma yê ke wextê verdayîşê înan ameyo, bi qerarê heyetê çimdarîye 6 aşmî yenê taloqkerdene. Bi seyan hepsî bi nê taloqkerdişê bêhuqûqî reyde rî bi rî yê. Madem ke ma do wayûbirayîya şaran awan bikerê, nê çîyê ke hepsîyanê sîyasîyan ser o benê, çi yê?”
“Bawerîya ma bi serekê ma est a”
Şîpalî peynî de va: “Mabênê Rayberê Şarê Kurdî Birêz Abdullah Ocalanî û dewleta tirke de muzakere dewam kena; ma bawerîya xo bi hostayê xo anê û hostayê ma do nê prosesî seba şarê kurdî serkewte bikero. Vengdayîşê ma yê îqtîdar û dewlete no yo: madem şima vanê ma do wayûbirayîya kurdan bikerê, ganî şima embazanê ma yê hepsîyan verdê. Embazê ma sûcdar nîyê; înan seba estbîyayîş û nasnameyê xo sîyaset kerdo. Sey TUHAY-DERî û keyeyanê hepsîyan waştişê ma yê nê prosesî nê yê.”
