Komeleya Çand û Hunerî ya Demhatî 30ê temmuza 2026î de seba ciwanan ameye awankerdene û vera polîtîkayanê şerê taybetî û hişbiran bi perwerdeyanê kulturî, hunerî û ziwanî dest bi xebatanê xo kerd. Endamê komeleyî Şahîn Aktî venga heme ciwananê Wanî da û vat: “Bêrê nasname û kulturê xo bipawê.”
Komeleya Çand û Hunerî ya Demhatî 30ê temmuza 2026î de Wan de bi amancê xebatanê ciwanan û pawitişê erjanê komelî bi merasîmêko girseyî ameyê akerdene. Komele vera polîtîkayanê şerê taybetî yê ke vera komelî û bitaybetî vera ciwanan ramîyenê, xo bi dersanê kulturî û hunerî rêxistin kena.
Endamê komele Şahîn Aktî behsê xebatanê komele kerd û venga ciwanan da ke beşdarê bername û dersanê komele bibê.
“Amanc pawitişê kulturî, hunerî û nasnameyî yo”
Şahîn Aktî destpêkê qiseykerdişê xo de bale ante hewcedarîya dezgehanê kulturî û hunerî ser o û dîyar kerd ke vera komel û ciwanan şerêko leymin ramîyeno. Şahîn Aktî vat ke no şerê leymin bitaybetî vera ciwanan ramîyeno: “Ciwanî zaf kewenê mîyanê madeyanê hişbiran û xebatanê leyminan û kultur, huner û nasnameyê xo xo vîr ra kenê. Amancê ma zî no yo ke ciwanî bêrê dezgehê Demhatî, ciwîyayîşêko newe awan bikerê û kultur, huner û nasnameyê xo bipawê.”
“Beşdarîya perwerdeyan roje bi roje zêdîyena”
Şahîn Aktî dîyar kerd ke Komeleya Demhatî perwerdeyê tembûr, resm, şano û ziwanê kurdkî dana û vat ke eleqe û beşdarîya ciwananê Wanî zaf rind a. Şahîn Aktî qiseykerdişê xo wina dewam kerd: “Beno ke nê xebatê ma demêko nêzdî de nêbê eşkera, la demêko derg de nê perwerdeyî do aver şêrê. Ciwanî demêk de ke binê astengan de bîyî, nika nê astengan ra vejîyayî û yenê dezgehê Demhatî. Beşdarîya cinîyanê ciwanan û komelî zî zaf rind a û beşdarîya perwerdeyanê ma roje bi roje zêdîyena.”
“Ameyoxê komelî ciwan ê”
Şahîn Aktî bale ante vindîbîyayîşê ciwananê Wanî ser o ke sebebê şerê taybetî ra yo û wina venga ciwananê Wanî da: “Ganî ciwanê ma bêrê dezgehê Demhatî, nasnameyê xo bişinasnê û beşdarê xebatanê Demhatî bibê. Komel bi pêşengîya ciwanan dînamîk o û eşkeno xo îdare bikero. Eke kultur û hunerê kurdan vindî bibo, ciwanî zî nêmanenê. Eke ciwanî nêmanê, komel zî vindî beno. Waştişê ma yê ciwanan no yo ke bêrê dezgehê Demhatî û beşdarê kultur û hunerî bibê ke ma bieşkê xo biresnê her ciwanêkê kurdî.”
